Lallunghnema
Charity Lodge
Cont: 9862288182
Kum thar 2026 chibai ka buk a che u.
Tun hi kumin atan chuan ka article hmasa ber tur a ni ang. Nikum 2025 khan Consumer Huangah hian article vawi 40 chuang lai bahlah lovin ka rawn ziak thei a. Zirtawpni apiangin ka rawn lang ve thin a ni. Chu’ng ka article te chu mi thahnemngai tak tak ten nasa takin an lo theh darh thin a. Chhiartu pawh an tam phah viauv min ka hria. Chhiartute zingah lo chhawrtu pawh in awm tih ka hria a. Phone call leh whatsApp message bakah ka chêt tlatna hmun hrang hrangah mi eng emaw zat comment ka dawngin ka ngaithla thin bawk.
Consumer Huang bâkah hian Centre For Consumer Education pawhin hma kan la nasa viau mai. Media hote thlâwpna leh thawhpuina kan dawng nasa a, a hlimawm tak zet zet a ni. Consumer-te harsatna lian tak Maximum Retail Price chungchangah pawh mipui an harh chhuak tan niin hriat a ni a. Thil zuartu leh hralhtute pawhin thil man an hriat loh chuan thil fun emaw a taka inbel MRP zat hi an en a. A man chu an hre ta thin a ni. MRP zata an hralh chuan thil tha ti ta riauvin an hria a. Mahse MRP aia hniam a thil hralh hi a dan tur dik tak a ni zawk a. MRP aia sanga thil hralh hi dan bawhchhiatna a ni a, hremna lek kawh theih a ni. He thu hi a nghet a, zawm ngei tur a ni. Ka sawi zing tawh. Hetiang thu hi kan tlangaupui kum tluan a, kan sawi a, kan ziak bawk thin a ni.
Legal Metrology Enforcement lam nen pawh kan thawkho tha hle. Consumer Affairs lama thawktute, Director leh a thawhpui te, Minister thlengin kan thawhhona a tha hle a ni. Hetiang mi kan nei hi keini Activist te tan leh Centre tan chuan malsawmna an ni ber mai.
Kum eng emaw zat he Consumer Right leh Issue ka buaipuinaah hian thlawpna tha tak ka dawn laiin whatsApp group thenkhata consumer thil ka han post hian comment a tlem em em thin hi a ni. Hengho hi khawvel thil danga inti changkang tak tak, (fel pawh an fel a, san pawh an sang, narawh e:llh) mi aia inti fingte an ni a. Keini ngaihah erawh mi fing ziktluak lo an ni thung. Vai mi fing an tluk lul lo kan ti a ni. Mahse, hengho hian mimala harsatna an tawh leh neihin min pun (approach) ta thin a. Lo hau ngawt chi an ni si lo!
Kum 2025 December ni 31 a ni a, kum hlui kan thlah, kum thar 2026 kan thleng a, kan hmang chho mek! Kan thupui hi :
SUMDAWNG THAR
+ CONSUMER THAR’ tih a ni. Kum tharah chuan rilru thar, belh tlâk, belh chian tlâk, rinawm, dik, kan nei tur a ni, tihna a ni ber.
Ka lawina Kohhranah chuan kan Kohhran Kum Thar programme Thupui chu “Thil hluite chu a lo ral ta a, ngai teh u, a lo thar ta” II Korinth 5:17 thu hi a ni a. Kei ve hi rawngbawltu ka lo nih ve bawk avangin New Year tuk January ni 1 Pathian Biak Inkhawm-ah chuan kan hotute chuan kan Inkhawm chu min kaihhruai tir ve a. Ka lawm hle. Rilru thar put tum rilru rân chung leh thinlung thar neih tum rilru chungin inkhawm ka hruai ta a. Kristian Hlabu number 553-na “Aw Lalpa i malsawmna hlu” tih chu ka han thlang a. Kan tui tlang hle. Lam tual khat tlatin an lam a. Kei pawhin sang theih tawpin ka ban ka phar a, ka kut te chu ka bêng ve a. A va nuam em! He hlimna hian rilru thar min pe se, tih chu ka beisei ber chu a ni.
Kum a thar, nasa takin kan neih thil tam tak sengin kan lawm! Kam hlim a ni, ti ru! Eng vang khera kum thar thleng nge maw kan nih le? Chhan a nei ngei ang. Rilru hlui, thil chhia paih ngam a ni a, rilru thianghlim fel fai neih nan a ni ngei ang. Rinawmna thar, dikna thar, felna thar, engkim thar hlak vek kan neih a ngai a nih hi!
Dawrkai duhâm, thil zuartu, hralhtu leh sumdawng chapo te, sumdawng duhâm te khan bansan rawh u. Rinawm taka thil zawrhte, rinawm taka thil hralhte, a lem, a tak ang maia zuar thin te, bungraw chhe(chhia) hralh chingte, customer te lo chêksawlh thinte, biak hrehawm tak tak te khan hawihhawm lo chhuah tawh teh u, kan ti a ni.
Nangni sumdawng tha lo te u, lo tha tawh rawh u. MRP phuah chawp ching te u, sim tawh rawh u. Kut tling lova sumdawn ching te u, in thil tih te tawp san tawh rawh u. Khin dikin buk ula, bungraw hmêlhem zawrh bansan tawh rawh u. Hlêpna bawlhhlawh ûm tawh lo ula, hlêpna dik zawng tawh rawh u.
Nangni thil leitu leh hmangtute u, consumer in nih angin in dikna leh chanvo humhalh tur in kê te chu pêntir tawh rawh u. Hengte hi veiin kawl tlat rawh u. Hawihhawmna te, dawhtheihna te, rinawmna te, huaisenna tein inthuam rawh u. Consumer Protection Act, Rules, Regulation te, chawisang ula, Legal Metrology Act te pawh ngaimawh thin rawh u. Gas hmangtutr pawhin Gas chungchanga hriat mgei ngei turte, electric consumer-te pawhin bill leh rate chinchang ngaihthah hauh suh u.
He Kum Thar 2026 hi consumer-te tan malsawmna dawn kum ni se, thil zuartu, hralhtute leh sumdawng lemchan thiam, sual rawngbawltute tan insiamthatna hun lo ni mawlh rawh se.
Chawlhkâr lehah kan titi ho leh dawn nia.