Ni sa hnuaia awm nasat lutuk chuan sunburn a awm thei tih kan hria, chutih ruala kan la hriat vak loh tur chu ni zung hi a allergic theih. Dr Clare Morrison, Medexpress-a medical advisor chuan, “Sun allergy hi ni sa hnuaia kan awm a, ni zungin kan vunah reaction a siam hi a ni. Polymorphic light eruption hi a common ber a ni a, hmeichhe vun ngo deuhin an nei duh lehzual,” a ti.
Sun allergy hi nghawng leh ban vel hi a awm nasat thinna a ni a, Dr Morrison chuan, “A lanchhuah dan hmasa chu vun thak, vun sen, leh vual sen ang deuh te hi a ni a, sin te te a bawl sen deuh sep sep te pawhin a awm thei. Chutiang chu ni sa hnuaia minute hnih khat lek awm emaw, darkar ral hnuah emaw te pawh a rawn awm nghal thei,” a ti bawk.
Sun allergy lanchhuah dan tlanglawn zual deuh te chu:
1. Vun a sen
2. Vun a thak
3. A na
4. Vunah sin te te a bawl sen deuh tiak a awm
5. Vun a khiin, a thi thei
6. Vunah durh a awm
7. Vun a vual sen deuh tuak
Heng symptom thenkhat te hi hay fever, eczema emaw eng thil emaw seh vang te pawh a ni ve thei tho bawk tih hriattel tur a ni. Dr Morrison chuan, “Nipui lai hian thlan te pawh a chhuak nasa a, chuvangin yeast infection risk te pawh a sang deuh thin,” a ti a, nipui laia vun ven nan taksa khuh tam chi thawmhnaw hak leh sunscreen hman that te a pawimawh niin a sawi a, “Sun allergy rawn tichhuaktu kha kan pumpelh chuan, a symptom rawn lang pawh enkawl em em ngai chuang lovin ni hnih khat hnuah ama tawkin a reh ve leh mai thei,” a ti a, “Mahse, a symptom chu a nasa a, a reh mai lo a nih chuan doctor rawn tur a ni,” a ti bawk.
Sun allergy
