Sunetra Pawar-i’n a pasal, Ajit-a aiawhin NCP kaihruai dawn

Sunetra Pawar-i’n a pasal, Ajit-a aiawhin NCP kaihruai dawn
Maharashtra Deputy Chief Minister Sunetra Pawar-i chu Nationalist Congress Party (NCP) national president thar a ni dawn.
Ajit Pawar-a’n a thihsan tak a nupui hi Devgiri-a an party thutkhawmah pawh an MLA zawng zawngten he chanvo chelh tur hian an thlawp vek a ni.
Hetih lai hian dan ang taka national president ni tur chuan an party executive committee thukhawmin an pawm a ngai a, February 26 hian an thukhawm dawn a ni.
Pawar-i rawtna hi an party National Working President Praful Patel-a sawi chhuah a ni a, MLA zawng zawngin an thlawp a, thutkhawmah pawh hian an thlawp tih lantir nan an ban an phar vek.
Rajya Sabha MP ni mek, Patel-a pawh hi he chanvo chelh tura sawi rik lian tak zinga mi a ni a. Hetih lai hian Ajit Pawar-a a thih tak thut hnuah khan an party hruaitu lawk tak takte chuan a kalsan tak, Sunetra-i kaihhruaina hnuaia awm chu an duh tih an sawi chhuak hlawm a ni.
Hetih lai hian eptute chuan Patel-a hi an sawihnawm phah nghal mek a. Ani hi Union Home Minister Amit Shah-a nena inhnimhnai tak an ni a, a chanvo a san chuan NCP leh BJP chu an inkungkaih lehzual sawt dawn nia ngaih a ni.
Sharad Pawar-a’n Patel-a hi Sunil Tatkare-a nen an party hruaitu ni turin a sawi ri tawh bawk a, anni pahnih hi NCP phel ta pahnih insuih zawm leh tum meknaa hmalatu langsar an ni.
Pawar-i hi kum 2024 Lok Sabha inthlanah khan a mopuinu a hneh lo va, hei vang hian Rajya Sabha-ah ruat seat a luah mek a. An party chief a nih hnuah erawh Rajya Sabha MP a nihna hi kalsanin a fapa upa zawk, Parth Pawar-a’n a ai a awh dawn nia sawi a ni.
NCP hi Sharad Pawar-a party a ni thin a, phelin lehlam hi Ajit Pawar-a khan a kaihruai a, tunah hian inzawm leh tumin hmalakna a awm mek nia sawi a ni.
Ajit-a hi January 28 zing khan Chhatrapati Shivaji Maharaj International Airport, Mumbai atanga Baramati Airport pana an thlawk chu an tum dawn laia chesualin a chuanpui mi dang pangate nen an thi a ni.
Party hruaitute chuan an MLA-te chu an party phel ta insuih zawm leh tumna awm mek chungchangah thil sawi chhuak mai mai rih lo turin an chah a. Phel hnia MLA-te ve ve hian a hma khan an lo sawi zauh zauh tawh thin a, NCP hruaitu lawk, a bikin Tatkare leh Patel te chuan indawrna a awm lo niin an sawi tlat thung a ni.