Super Bowl Halftime show-ah Taylor Swift a perform ang em?
2026 Super Bowl chu Levi Stadium-ah neih a ni dawn a, he NFL final show, khawvela show entu ngah ber pawl ni thin halftime show-ah hian Taylor Swift a perform dawn niawma sawi thawm a lian ta hle a, fans lam pawhin Swift inlan hun hi an nghakhlel tawh riau a ni.
NFL commissioner Roger Goodell lahin fans tana beiseiawm tak tawngkam a nei tlat mai a, “Taylor hi rawn inlan se kan lawm ngawt ang. Mi bik, talent tha bik nei a ni a. Chuvangin, engtiklai pawhin a tan kan inhawng reng,” tiin an interview-naah a sawi chhuak.
Roger hi a kawmtu Savannah Guthrie chuan nakkum February thlaa San Francisco 49’ers stadium-a Super Bowl Halftime show-ah Taylor Swift performance chu beisei theih a ni dawn em tia a zawh belhna chhangin, Roger chuan, “Chutiang lam chu engmah ka sawi thei rih lo” tiin halftime show-a perform tur hi buaipui lai mek a nih thu a sawi a, chutirualin Taylor chungchangah chuan, “maithei” tiin a chhang bawk.
Kum hnih vel kalta atang tawh khan fans lam chuan Super Bowl halftime show-ah hian Taylor Swift hi an beisei tawh a, mahse, ama ber hian he halftime show-a perform lam hi a hawi vak mang tlat lo thin mai pawh a. Super Bowl halftime show headline thei nih hi zaithiam zawng zawng duhthusam anga ngaih a ni thin nain, Swift erawhin rilru dang a pu deuh tlat a. He show-a perform te hian hlawh an nei lo a, an senso mahni intum a ngai deuh ti tih thin zawk hial a, hei hi Swift hian a tivak lo niin a lang.
Mahse, tunah chuan Kansas City Chiefs player Travis Kelce nen an inhual rup tawh a, NFL game hrang hrangah a tawih Kelce tawiawmin a inlan ta fo a, tunah chuan a rilru sukthlek pawh a danglam deuh tawh a ni mahna!
Super Bowl Halftime show-ah Taylor Swift a perform ang em?
