Super Bowl LIX halftime show zar zoin Kendrick Lamar ‘Not Like Us’ a No.1

Super Bowl LIX halftime show zar zoin Kendrick Lamar ‘Not Like Us’ a No.1
Kendrick Lamar hla hit ‘Not Like Us’ chu Billboard Hot 100 (singles) chart-ah No.15 atangin No.1 a kai thar leh a, nikum July hnua he chart-a a No.1 lehna hmasa ber a ni. He hla hi February thla tira Super Bowl LIX halftime show-ah Lamar hian a rawn perform a, hei hian a tilar thar leh ta a ni. Hetihrual hian Chappell Roan ‘Pink Pony Club’ leh SZA ‘30 for 30’ featuring Lamar te pawh top 10-ah an lang.
‘Not Like Us’ hi May 2024 thla laihawl chart-ah No.1-ah a debut a, chumi hnuah No.2 leh No.6 inkarah kar riat chhung a vir kual zak zak a, 2024 July thla chawnu lam chart-ah No.1 a rawn kai leh a, tunah a vawi thum nan a No.1 leh ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all genre US streaming (official audio leh official video), radio airplay leh sales data te chu tehna pawimawh a ni. ‘Not Like Us’ hian stream maktaduai 49, radio airplay maktaduai 20.5 leh sales 33,000 a nei leh a, hei hi chart-ah a No.1 pui leh ta a ni. He hla hi Super Bowl-a a perform hnuah stream 156%, radio airplay 31% leh sales 432%-in a pung.
Kendrick Lamar hla dang ‘Luther’ featuring SZA chuan stream maktaduai 42.7 kaiin, chu No.3 atangin No.2-ah a insawn a, a hla dang ‘TV Off’ featuring Lefty Gunplay-in stream maktaduai 35.7 neiin, No.10 atangin No.3 a kai thar ve leh ta bawk. Heng hlate hi Super Bowl halftime show-a a perform vek an ni.
Kendrick Lamar hi Billboard Hot 100 chart-a tum khata top 3 a hla nei vek thei palina a ni a, hetiang hi The Beatles (1964), Ariana Grande (2019), Drake (2021 leh 2023) bakah Taylor Swift (2022 leh 2024) ten an lo nei tawh bawk.
Chart No.1 hlui Lady Gaga leh Bruno Mars ‘Die With a Smile’ chu No.1 atangin No.4-ah a tawlh a, Lamar hla dang ‘Squabble Up’ chu No.20 atangin No.5-ah a invawrh thar leh a, Billie Eilish ‘Birds of a Feater’ chu No.4 atangin No.6-ah a tawlh ta a, ROSE leh Bruno Mars ‘APT.’ chu No.6 atangin No.7-ah tawlhin, chart No.1 hlui Shaboozey ‘A Bar Song (Tipsy)’ chu No.5 atangin No.8-ah a tawlh ta bawk.
Chappell Roan ‘Pink Pony Club’ chu No.18 atangin No.9-ah a invawrh a, he hla i Grammy Award semnaah khan a perform a, best new artist a dawng bawk a, hei hian a hla a tilar thar leh ta a ni. SZA ‘30 for 30’ featuring Lamar chu No.22 atangin No.10-ah a invawrh a, he hla hi Super Bowl halftime show-ah khan SZA leh Lamar te hian an perform duh nghe nghe a ni.