Sawhthing chingtute hnena sawrkarin an sawhthing a leisakna atangin support price pek chhuah tur cheng nuai 1388 an la nei a, tunkar chhung hian pek kim hman an tum dawn tih Mizoram Agriculture Marketing Board chairman, minister PC Vanlalruata chuan a sawi.
Thawhtannia ZPM party office-a inkhawmah Agriculture & Farmer’s Welfare minister PC Vanlalruata hian, chief minister Pu Lalduhoma’n thlai rate hresa in hna an thawk ang, tia kuthnathawktute a lo tiam tawh chu an tihlawhtling mek a, kumin chhung hian support price kaltlanga sawhthing an hralh chu quintal 225335 niin, support price an pek chhuah tawh chu Rs. 37,24,36,279 a ni a, pek chhuah tur Rs. 13,88,73,216 an la nei a, tunkar chhung hian pek kim hman hram an tum tih a sawi.
Kuthnathawktuten thlai an hralh that theih lohna chhawktu tur, central scheme pakhat – Market Intervention Scheme (MIS) chu nikum khan sawhthing vangin an claim a, Mizoram Agriculture Marketing Board account-ah MIS atang hian Rs. 9,48,14,281 a lut fel tawh tih a sawi. “Vanneihthlak takin sawrkar rate aia sangin sawhthing thahnem tak hralh a ni a, sawrkarin sawhthing a leina figure zat pawh a tlahniam viau,” a ti.
Sawhthing bikah sawrkarin tan a la a, kuthnathawktute hnena an tiam tawh chu tih hlamzuih thiang a ni loa, chief minister-in nasa taka hma lain NITI Ayog kaltlangin DoNER-in sawhthing sawngbawlna tur a pe tawh tih Agriculture minister hian a sawi a. A bul tanna atan Champhai district hmun pali-ah ruahmanin, a hmunpui ber tur Mualkawiah dah a ni anga, Vaphai, Tualcheng leh Zotlangah unit te zawk dah an tum tih a sawi.
Tunah DoNER atangin cheng vaibelchhe 30.13 an dawng tawh a, e-Tender hmangin a thawktu tur thlanfel a ni tawh a. DoNER-in a buaipui piahlamah Tuirial leh Khamrangah MAMB hmalaknain sawhthing sawngbawlna hi din tuma hma lak mek a ni tih a sawi bawk.
“Kalphung thar sawrkarah chuan market buaipui tham neih kan duh a. Chief Minister Rubber Mission hnuaiah phase 1 kalpui a ni tawh a, kum 2026-ah hian phase 2 kalpui leh mek niin, kum 2027-ah phase 3 kalpui a ni dawn a, chhungkaw tam takin sawrkar puihnain rubber an phun mek,” PC Vanlalruata hian a ti.
Agriculture minister sawi danin kum 2026
chhunga sawhthing hralh tam zualte chu
Secondary Collection Center (SCC):
SCC hming in kg
(i) Khuangleng 1560550
(ii) Cherhlun 703870
(iii) Keifang 621708
Primary Collection Center (PCC):
PCC hming in kg
(i) Maite 317347
(ii) Hliappui 295240
(iii) Cherhlun 288880
Mimal hralh tam zual:
Hming Khua In kg
(i) Zoremnghaka New West Phaileng 26462
(ii) Lalmalsawmi Champhai Zion Veng 23129
(iii) HelenLalrosiami Dungtlang 22046
* Mimal sawhthing hralh tam 10 chin belhkhawmin kg. 2,18,936 a ni.