Nimina Mizoram Agricultural Marketing Board thutkhawmnaah, Mizoram sawrkarin kuthnathawktute tharchhuah chi li —Sawhthing, Aieng, Hmarcha leh Hmunphiah-a support price pek dan tur chungchang sawiho a ni a. Thil tam tak an rel zingah, Hmunphiah ro chauh support price pek tur te, Sawhthing leh Aieng support price pek theih hun chhung January-May tih te, Hmarcha leh Hmunphiahah January-March tihte a tel a.
Tuna sawrkarna fawng chelh mek party hian inthlan dawn khan kuthnathawktute hamthatna an ngaihtuah tur thu leh an thlai tharchhuah chi li-ah support price dah a nih tur thu an aupui a, chu chu an tlin phah niin a lang.
Sawrkar thar a han inrem fel a, support price pek dan tur chungchang relin kum khat chu a ral a ni leh ta mai a. Agricultural marketing board an thutkhawm apiangin thil thar a lo chhuak zel ni maiin a lang a; tunah, support price pek theih hun chhung bi tuk chu a lo lang leh ta a.
India sawrkar hian thlai chi hrang hrang chi 24-ah minimum support price a pe mek a, thlasik laia tharchhuah chi ‘thlasik thlai’ kan tih mai ‘Rabi Crops’ chi 10 leh Fur thlai kan tih mai ‘Monsoon Crops’ (Kharif Crops) chi 14 a ni. Heng zinga Mizo ten kan hriat lar tur chu buhfai leh vaimim hi a ni awm e.
Heng minimum support price hi “Minimum Support Price Guarantee Act, 2022” hnuaia siam niin kum tluana hman tur a ni a, January-March tih lam a awm lo. Kum tin a rate hi tihsan hret hret a ni zawk a. Entir nan, kan hriat lar ber buhfai (paddy) hi 2019-20 khan quintal-ah Rs 1815 (Rs 18.15/Kg) a ni. A kum telin a sang chho hret hret a, 2024-2025 ah chuan Rs 2300 (Rs 23.00/Kg) a ni tawh.
Sawrkar laipui kalphung leh State pachhe ber kalphung chu khaikhin rual a ni lovang; mahse, kuthnathawktute hmakhua ngaia thil kan ti a nih chuan, kum tluanin kal ve thei se, a tul ta a nih chuan a kum lehah rate chu siksawi ni leh mai se. Kum tluana kuthnathawktuten an buaipui hi chu kum tluana a dehralna hun hawnsak hi thil kalphung tur niawm tak a ni.
Support price tan hun bi tuk…
