Surveyor hna thawhpui turin private firm 16 nen inrem ta

Land Revenue & Settlement department chuan ram survey hna thawk thei turin private firm a pawmpui 16 nen thawhdunna thuthlung a siam.
Land survey leh demarcation chungchanga department-a technical officer leh staff-te indaih lohna avanga mipui harsatna tawh sukiang turin empanelled land survey firm-te chu Thawhtanni khan Land Revenue & Settlement minister B Lalchhanzova pisa-ah kohkhawm an ni a. Land Revenue & Settlement secretary Dr H Lalthlangliana leh land survey firm official aiawhten minister hmaah ‘Deed of Agreement’ ah hming an ziah hnan.
Tun sawrkarah hian land survey firm 16-te empanelment siam a ni a. Heng empanelled survey firm-te hian a taka hna thawk thei turin sawrkar nen inthlunzawmna thu an siam fel a ni.
Ram mamawh leh ram kaihhnawiha harsatna tam tak chinfel a nih theih nan sawrkara thawktu surveyor indaih lohna avanga mipui harsatna tawh sutkian zel tum a ni tih minister hian a sawi a. Survey firm-te hnenah duhsakna hlanin, sawrkar mit tlung taka an hna thawk tur leh land survey kalpui a, mipui harsatna hrethiam a, hawihhawm taka dan hnuaia hna thawk turin a chah.
Land survey firm-te hi orientation training pek an ni anga; training paltlangte hnenah danin a tuk angin land survey licence pek an ni ang. He inremna thuthlungah hian Land Revenue & Settlement department hriatpuina leh phalna hnuaiah land survey firm leh mipuiin awlsam zawka ram survey leh demarcation an kalpui theihna tur ruahman a ni.