Land Revenue & Settlement department-a surveyor-te indaihlohna avanga mipuiin harsatna an tawh thin sutkian nan department chuan empanelled survey firm 13 a thawhpui dawn a. Zirtawpni khan thawhpuina nemnghehna hun hman a ni. Hmanpuitu Home minister K Sapdanga chuan ram teh sak tur department lam hun rei tak tak nghah ngai thin chu amah ngei pawhin a lo tawng tawh a, in hmun atana an teh fel sak hnu ah chhiah a chawi ta tawk tawk a, sawrkara chhiah luhna tur an teh fel sak thei lawk lo chu a mak zawk hle tih a sawi.
He harsatna hi tuna empanelled survey firms hmang hian sutkian a ni dawn ta tih sawiin, empanelled firms-te chu, sum siamna atan ni lo, ram siamthatna atana ke pen turin an beisei a. Mipui dawr nuam taka awma turin an chah tih a sawi. “Hna zahawm in thawk dawn a, ram tana thahnemngai taka in thawh chuan malsawmna in dawng ngei ang tih ka ring a ni,” a ti.
Sawrkar hausakna chu chhiah atangin a ni a, sawrkar hausa lo atangin mipui hausa a awm hleithei loa, sawrkar a hausak chuan mipui pawh an hausa dawn tih K Sapdanga hian a sawi. “Kan chawi loh tur chawi emaw intia chhiah kan pek hian rilru a na thin a, kan hmasawnna tura pe kan ni tih hriat hian kan rilru pawh a nuam thin. Hei hi kalphung thar, mipui tana sawrkar tia chhal ngam niin ka hria,” a ti. Hmasawn tum chuan chhiah pek tam a ngai tih a sawi.
Revenue department-a thawkte chu sawrkar sum kung an nih avangin hawihhawmna tinreng nen mipui dawr turin a chah bawk.
Land Revenue minister B. Lalchhanzova chuan empanelled firm neih hi sawrkar hmasa hun atanga ruahmanna awm tawh, theih ang ang an bawhzui chhoh a ni tih a sawi a. Mipui nena inzahtawn taka indawr thin turin empanelled survey firm-te a chah tih a sawi.
“Ka duh ber chu, sawipuitu nei lo mipuiin samkhai leh awlsam zawka an ram an tehfel ve zung zung theih hi a ni. Firm 13 nen kan thawk ho dawn a, hna hi semrual kan tum lo a, a thawk tha tha ten hna an hmu tam mai dawn a ni,” a ti.
Surveyor-te pui turin Revenue-in empanelled firm 13 thawhpui dawn
