RK Dawla
Mb 9366095658
1. Khawvawh vanglai kan thleng chhova, Mizo Kristiante tâna hun pawimawh ber Krismas & kumthar kan tiak chiah bawk a. Hmun tam takah chuan nakum lam thlawhhma tur kan vât zo leh tawh a, hmun thenkhatah chuan kumthar ruai tiak rualin kan bung nghal thung ang a. Kan jhumm system hi a upa tawh êm êm a, a hlawk lutuk loh bâkah environment-in a tuar nasa thin a. Chutih rualin a thlakna tur system tha kan ban phâk mai lo deuh a, hei vang hian kan la practice hrâm hrâm ni berin a lang. Chenna leh chêt vêl nân pi leh pu atangin tlang sâng lam kan bawh thin a. Hei hian hmunhma ngelnghet buatsaih kawngah pawh harsatna tam tak a siam thin. Tui lâk a lo harsa a, tui tel lo chuan hlawk leh tlo taka farming khawih a har a. Tin, tlang chhip leilung chu a lo dâk khan, automatic-a rawn recharge leh maitu tur a awm ta lova. Sustainable management a harsa êm êm ta thin.
2. Huan tur ram nei thar tur emaw lei thar tur emaw chuan, tunlai khawvel atân chuan, hmun hniam lam zel a fuh a. Ramngaw leh kawrte tuiin a chawm theih ram nise a tha ber. Mizoram leilunga kan harsatna tam ber intanna chu ruahsur vanga lei khal char (compacted soil) leh tuihâwk vanga leilung kalral hi a ni a. Kawng hrang hrangin leilung kalral leh khal châr thin hi ven theih ni mah se, farmer-te efficiency hian a phâk lo tlangpui rih a. Hei vang hian, hmun hniam lam, kawrte tui leh ramngaw thliin a chawm theih-naah huan kumhlun din hi a pawimawh takzet tawh a ni. Hmun sâng laiah huan kan siam a nih pawhin, tunlaiin sawrkar laipuiin ni eng hmanga tui pump-na scheme tha tak a siam tawh a. Hengte hi ngaihven a, hman tangkai a hlu hle. Kan thlaite tui pe tur chauh ni lovin, thal laia kan huan leilung pumpui kha tui kan pêk a pawimawh zawk a. Hmunhma inang, thlai thuhmun theuh theuh pawh, thâl laia tui pêk theih hmunhma chu thlai kumhlun pawh a tlo hleiin a hlâwk hlei êm êm. Chuvangin, farming kan luhchilh rau rau a nih chuan, tlo zawk, hlawk zawk, phurawm zawka enkawl turin insèn hreh lo ila. A thuhrimin kan ramah hian construction work kan uar lutuk deuh nge, huan tam takah hian thal tuipêkna infrastructure awm mumal mang si lo, thlam ropui deuh deuh hi kan uar zawk a! Ropui deuhin kan changkang lo a ni!
3. Tin, seasonal thlai chungchangah, GMO leh Hybrid thlai kan uar lutuk hi that lohna tam tak a awm. Trial kan neih tawh pakhat chu, kan Mizo fanghma pangngai hi thlasika thar turin October thla tawpah kan enchhin tawh a. Aphids lakah ven a ngai deuh tih loh chu, hybrid fanghma aiin a hlawk lohna a awm hran miah lo! Chutiangin, kan tualto thlai tam tak – ankasa, pardi, lengmaser etc pawh hi an off-season theih ngei ang. Buaipui an hlawh lo mai mai a ni. Hybrid leh GMO thlaite hi chaw heh leh enkawl hautak an ni a. A chi chhuah leh tlâk an ni meuh lo bawk. Fertilizer company leh thlai chi siamtu company sala min tàntirtu mai an ni. A chi man a tova, kan leilung hrik (soil microbes)-ten an thawhpui thiam meuh lova, chuvangin leitha uchuak taka hman a ngaih phah a. Leilung kan tichhe telh telh tih hi hlawk taka kan thar emaw kan tih lai hian – thudik a ni! Pathianin Mizorama awm tur chu kan pian ve hma khan a lo dah lawk diam tawh a, chungho chu hlawk taka buaipui leh khawvel huapa chawilar chu kan mawhphurhna a ni e. Kan area theuhah hian chîk ta ila, kan phun mai mai thin, enkawl lem loh, tha taka thang leh rah thin tlangpui hi an awm ve châwk ania. Khangho kha tu hrilh hran ngai lova, kan location-a hlawhtling awlsam leh hlawk tur thlai chu an ni phawt thin. Ho tê anga kan ngaih kan kal pelh mai mai thinte atang hian thil ropui a lo chhuak fo ania. Tin, hetianga kan vela thil awmte chîk chunga hma lâk hi a scientific êm êm bawk. Science laboratory hmanrua leh khawl ropui tak tak hmanga farm siam kher hi scientific farming a ni chuang lo. Zofate kan thanharh a ngai hle, kan ram potential haichhuak tak tak tur hi chuan.