RK Dawla
Mb 9366095658
1. Lo zawh thla kan thleng a, nikhat chhung rau rauah pawh ruah tlâk leh nisat tum vawi 4/5 a awm theih hun lai a ni. Tlangram leh leilet buh chingtute hian kan buhte chawm nân – Urea, DAP, MOP, MAP, SSP etc chu kan hre lar viau a. A tha reng. Mahsela, hengho hi thlai chaw bulpui 3 chauh petu mai an ni. A bâk chi 13 (Calcium, Magnesium, Sulphur, Zinc, boron etc), tlem thama an mamawh, loh theih lohva an mamawh si kha a la tel lova. Chuvang chuan, tlangram leh phaizawla buh chingtuten buh vitamin – Multiplex, Jagromin etc hi pêk ve kan ngai e. August thlaah chuan buh a rawn pêng hmuhnawm tan tawh a, buk (foliage) tha tak an rawn chhuah tawh tlangpui. Hetih hun lai tak hian Vitamins/Micronutrient pêk hunlai tak niin, a tui chi a nih chuan 3ml/L tuipawlhin, a phut chi a nih chuan 3gm/L tuipawlhin buh kung kha kah tur a ni. Duhthusamah phei chuan, October thla tirah kah leh a tha a. Hei hian buh rah a tihlâwkin, buh thar a tihtam phah a, a sî vûi a tlêm phah a. Kumpui lingleta kan buaipui, kan chaw rinpui ber, buh hi farmer-te hian kan ngaihsak detail lo mah mah thin e. A theih hrâm chuan, fulvic acid nen Micronutrient hi pawlh tur a ni a. Tuisik 16L kha, Sprayer burah khan 50gm or 50ml Micronutrient telh hnu-ah khan, Fulvic acid hi 10-20 ml vel telh ila, tichuan a thawk chak lehzual thin e.
2. Thlasik thlai (Rabi crops) chin a hun chho leh tan a. July thlaa bean chinte phei chu, a zâm buk leh tan tawh a. August thla pawh hian a la chin theih zel a. Amaherawhchu, tun ang hun atanga thlai chi tuhte hi rannungin a khawihchhiat duh êm avangin, hmun himah a theih chin chin chu kui hmasak a tha. Tichuan, tha sên a tlêm hlek a, zuva laka thlai chi riral a tlêm bawk. Mahni inbul leh huanah pawh nise, seedtray nei lo pawhin seedbed/polypot siamin thlai chi a tihtiah lailawk (nursery) mai theih a. Huan leh lo hmuna thlai kuichilh duh tân, a chung awih vata zarin thosilen hmanga khuh hi a tihchi phian. Thosilen bang hian thlai eichhetu rannung tam tak a vêng a. A chung awih vata zar hian ruah tam lutukin thlai chi a hawrh khaw lo tur a veng bawk. Thlai chi nursery hmasak hian, nusery-ah thlai an tiah leh than chhungin, a phunna tur hmunhma kan lo buatsaih char char thei a. A remchâng viau. Tin, ruahtui a la tlâk lai chuan, thlai phunna tur khur kan siam a nih chuan, lei pangngai aia sâng hleka hnawh leh tur a ni. Hei hian thlai phun hunah, thlai bi bula tui tling tur a veng a, a zung tawih leh than thu nasa tur a vêng viau bawk.
3. Kitchen garden atanga Nûl thlenga kan intihhmuh lutuk loh, thil pakhat tha leh remchang tak chu – raised bed siam hi a ni. Raised bed hi mawi leh tha taka siam hran a ngai lova, a vêl lei hual vela rih khuar mai kha a tâwk a. Entirnan, tlema hmun rem deuh kha a dung 50ft, a vang 10ft vel kan mark ang a. Tichuan, kan mark-na lai, a sir kual zai zai chu kan lai khuar hlek ang a. Bed chhung hnim kha tifai lovin kan nam tlu/delh tlu ang a. A vela hnim dang kan vawmlût bawk ang a. Khûp chen vela sânga hnim kan vawm muk rual tawh hnu-ah tuipuan/silpaulin/weedmat/changel hnah hmanga khuh phui leh tur a ni. Kan khuh phui that chuan, thla 1-1½ hnu-ah a khuhna kan hawng ang a, hnim khuh hlum keu kauin thlai chi a tuh theih a, thlai tiak a phun luh theih bawk. Kan hnim khuh a chhah that chuan, tui pêk lutuk ngai lovin favangah pawh thlai an thang chho mai a. Tin, hnim tawih a tam avangin leitha pêk lutuk a ngai lo bawk. Tin, hnim khuh ro khan thlai bul lei a vawnhim tlat avangin, hnim a to tam thei lova, hlo thlawh a ngai tlêm êm êm bawk. Leilung hi hnim ruangin 2-3 inch vela bit taka a khuh chuan, hlo tiak tur 90% hi a control nghal a, hlo vanga buaina a thleng neuh thin lo a ni. Tun tum thlasik chu, tihdan thar leh awlsam zawk pakhat tal enchhin tel ngeiin liam ngei teh se. Hmasawnna leh thil thar ropui intanna hi thil hotê anga lang hi a ni fo ania!