Svitolina dan zawh loh Keys hmaa ding tur Swiatek

Svitolina dan zawh loh Keys hmaa ding tur Swiatek
Game thum chiah hlohin nimin quarter-final inkhel pakhatah coach thar Wim Fissette hnuaia hriam hrak Iga Swiatek chuan 6-1 6-2-a eighth seed Emma Navarro sawpin, Melbourne title hmasaber a beisei leh mekna kawngah Australian Open semi-final a lut a, Madison Keys nen final luh an inchuh ang.
Pole Swiatek hian kumin Melbourne Park-ah game li chiah la hlohin, chu’ng zinga game sarih chu first-round match lama a hloh a ni.
Clay leilung bika Swiatek-i chungnunna hi chu hmuh hmaih theih lohin Paris khawpuiah a tarchhuak tawh a, French Open title hnuhnung panga zinga pali latu a ni a, mahse, ball thlawh thawt fua fuana Melbourne hard court lamah erawh a che hlei thei tlat lo a, kumin tih lohah tunhma lamin tum khat chiah fourth round a la pel zo!
Tarlan tak angin, coach thar Fissette hnuaiah kumin hian Melbourne leilungah a rawn hriam thar ta tlat a, Melbourne last four a luhna kawnga game 14 chiah a chhuah hi a nep lo a, Open era bikah hetih kawnga ani aia game hloh tlem chu player pathum chiah an awm.
A match hnuhnung paliah khan serve avanga game hloh a nei miah lo bawk a; chu’ng a match paltlang palite chuan minute 90 a awh pel lo vek.
Semi-final hi paltlang leh se, vawiin semi-final dangah top seed Sabalenka hi tlawm bawk se Swiatek hian Belarusian hmakhalhin world number one ranking a neikir leh thei hial dawn a ni.
Semi-final-ah chak ve ve ni se Sabalenka tan a No. 1 nihna humhim turin championship match-a chak a mamawh ang.
Pole hmaa fiahna hautak hmachhawn tur American Keys chuan last four luh inchuh match-ah set hmasa ber hloh zet chungin Elina Svitolina lakah 3-6 6-3 6-4 hnehna a changlet a, player tha zet Navarro paltlang thei ngat Swiatek hneh zui leh tur chuan kum 2015 leh 2022-a Melbourne last four thleng tawh Keys hian a vuak nat theihna sangber (big-hitting best) anga a khelhchhuah theih a ngai ngei ang le!
Tun kha kum 29 mi ni ve tawh Madison Keys tan Grand Slam singles semi-final a thlen vawirukna leh Australian Open bika last four a luh vawithumna niin, Australian Open inbuatsaihna hnuhnung lam Adelaide Open title a lakna kawng nen chhiarzawmin match 10 a chak zawn tling ta chiah a ni.
Semi-final pakhat zawka a tum leh tur Swiatek nena vawinga an insut tawhah vawli tlawmin, vawikhat a chak ve tawh a, mahse, tuna Australian Open an khelhna ang khelmual (hard-court) bika an intum hnuhnungber kum 2022 Cincinnati Open-ah khan a chak zawk tlat mai a, hun kal tawh chu hmalam hun tehfung lian bera hman tlak ni lo mah se kha hnehna khan American rilruah inrintawkna engemawchen chu a siamsak ve ngeiin a rinawm.
Second seed Swiatek pawh hian a sut leh tur Keys hi a dahhniam lo a, “Madison hi player ropui niin, tawnhriat a nei tha em em tawh bawk a, chuvangin, tunge dingchang zawk dawn sawi theih a ni lo. Ka hneh loh tum khan min raphrual hneh hle a, kan hmabak pawh hi a hautakin, game sawilawk harsa tak a ni ngei ang,” a ti.
Rock Island, Illinois chhuak Keys kha Grand Slam match bika Svitolina nen vawithum an intawn tawha a hnuhnung pahnihah a tlawm a, an insut hnaivai ber chu 2019 US Open fourth round kha niin, tuntum Rod Laver Arena inkhelah pawh hian Ukrainian hi rinkai zawk a ni a, mahse, nui hnuhnung zawk chu American.