Kum 8 vel kaltaa sawrkar laipuiin tourism chawikanna atana Swadesh Darshan 1.0 (SD1.0) hnuaia Mizoram tana project sum a pek chhuah dan chu tun hnai khan Mizoram Tourism department chuan thuchhuah siamin a tarlang a. Thuchhuahin a tarlan dan chuan, project pumpui atana sum ruahman (sanction) chu cheng nuai 9907 a ni a. Heta tanga cheng nuai 4953.10 chu Mizoram tan released a ni a; chu chu sum sanction atanga 49.99% (i.e 50%) a ni.
Kan hriat angin SD 1.0 hnuaia Project hi — “Development of Eco-Adventure Circuit Aizawl - Rawpuichhip - Khawhpawp - Durtlang - Chaltlang - Sakawrhmuituai Tlang - Muthi - Berawtlang - Tuirial Airfield - Hmuifang tih a ni.
He project hnuaia mipuiin kan hriat lar tak em em chu - ‘Skywalk’ (Sakawrhmuituai Tlang) leh Ropeway (Durtlang-Chaltlang) te hi an ni. A bak zawng, a chunga tarlan Rawpuichhip, Khawhpawp, Muthi, Berawtlang, Tuirial Airfield leh Hmuifang te hi chu eng nge an dinhmun ni ve tih lam hi mipui nawlpui chuan kan hre ta mang lo a ni.
Tuna tourism department-in Swadesh Darshan 1.0 sawifiahna a rawn tihchhuahah pawh hian, sawrkar laipui atanga sum released dan te, eng zat nge Mizoramin sum a hmuh tawh tihte a ni deuh mai a. Eng vanga sum hi a chanve chauh dawng nge kan nih tih te, SD1.0 hnuaia project hrang hrangte hi a nihna tur anga zawh fel hman a awm em tih te, a awm lo a nih chuan, cheng nuai 4953.10 hmang hian project pakhat tal pawh eng vanga puitlin loh nge a nih te pawh hi mipui hriat chak tur a ni a, chu chu tourism department hian chiang taka thil dang a tarlang ang tho hian tarlang tel ve thei se a duhawm hle a ni.
Tunah hian sawrkar laipui chuan Swadesh Darshan 1.0 chhunzawm lehna tur Swadesh Darshan 2.0 a ruahman leh tawh a. Hemi chungchang hi Mizoramah pawh July ni 31, 2023 khan sawiho a lo ni daih tawh a, Aizawl district leh Champhai district-a kalpui tur a ni. Sawrkar laipui chuan state hrang hrang tan SD 2.0 hnuaiah hian project 76 tan cheng vbch 5294.11 hu a ruahman fel tawh a ni.
SD1.0 kan kalpui dan ngaihtuahin, SD2.0 pawh hi eng ruaiah kan chan lo mai ang tih a hlauhawm a. Hnathawhna tur sum a chanve chauh dawng a, eng project mah thawk zo tak tak si lova kan awm tawh loh nan, sawrkar leh mipui lam pawhin, SD2.0 hi chu champion pui ve ngei tawh turin tan i la tlang ang u.
