Police chuan Sweden lailia zirna inah inkahna thlengah mi 10 chuang kah hlum an ni a, an zingah hian silai hmet puaktu ber nia rin pawh a tel tih an sawi.
An khawpui, Stockholm atanga khawthlang lam km 200 vela hla, Orebro-a Risbergska school-a inkahna hi Thawhlehni chawhnua thleng a ni.
Police chuan a titu hi tun hma lamin an la hriat ngai loh thu leh hetianga a chet chhan pawh hi an la hriat mai theih loh thu an sawi a. Amaha che niin an ring bawk.
Thawhlehni zanah khan thi zat hi an la pun theih thu an sawi a, hliam tuar zingah na tak tak an la awm niin an sawi.
“He thil thleng hi a lungchhiatthlak tak zet a ni,” tiin Orebro police chief Roberto Eid Forest chuan a sawi a. Swedish prime minister pawhin ‘Sweden pum pui tan ni hrehawm ber’ a nih thu a lo sawi tawh bawk.
Hliam tuar eng emaw zat chu damdawi inah kalpui an ni a, an zinga pali vel chu zai nghal an ni.
Police chuan ‘mi thah tumna leh rawng taka mi beihna’ tia sawiin an chhui zui mek a. Zana thuthar lakhawmtute an kawmnaah chuan a lan danah mi firfiak chetna a nih a rinawm loh thu an sawi nghal bawk.
Police hian puitlingin thil an zirna, Risbergska school-a inkahna thleng hi an rama chhun dar 12:33 (India-a tlai dar 06:14)-ah an hria a. A thlenna hmun (campus)-ah hian sikul dang pawh a awm nual bawk.
Heng centre-te hi a tlangpuiin puitling ni tawh, primary emaw, secondary school emaw zir chhuak loten thil an zirna atan an hman a ni.
A tirah chuan a bul hnai sikula zirlai dangte chu venhimna thil avangin ‘pawn chhuak lo turin in chhungah khung an ni.
“Vantlangin an tlawhpawh kha kan duh lo a ni,” tiin Forest-a chuan a sawi.
Tual chhung chanchinbute chuan a bul hnaia damdawi inten an emergency room leh intensive care unit te chu hliam tuarte enkawlna atan an tiruak nghal hlawm tih an tar lang.
Orebro University Hospital chuan silaimuin a fuh avanga hliam tuar mi panga chu an emergency room-ah an enkawl thu an sawi a. Mi dang pakhat, silaimu tawng fuh ve lo pawh ‘hliam tenau’ a tawrh avangin an enkawl bawk tih an sawi.
Zirtirtu Lena Warenmark-i chuan Swedish public radio, SVT hnenah an awmna bul lawkah silai puak vawi 10 vel a hriat thu a sawi.
Prime Minister Ulf Kristersson chuan ‘Sweden pum tan ni hrehawm tak’ a nih thu a sawi a, ‘sikul kai ni pangngai’ chu ‘firfiak taka chetna’ niin a thlak thu leh a tuartute a tawrhpui tak zet thu a sawi.
“Sorkar chu police thuneitute nen inbepawp rengin thil thleng kal zel dan a ngaihven reng a ni,” a ti.
Sweden-a zirna inah inkahnaah mi 10 thi
