Sweden chuan March 7 khan NATO zawm fel tain transatlantic military alliance member ram 32-na a ni ta chiah a, tihian post-World War II neutrality a kum tam a awm tawhna chu Russia huangtauna laka hlauhthawnna neiin military alliance a zawm ve ta a ni.
Official-a Sweden Nato member atana lakluhnaah hian Swedish Prime Minister Ulf Kristersson leh US Secretary of State Antony Blinken te chuan an telpui a ni.
“Sweden tan hun chhinchhiahtlak a ni a. Alliance tan pawh hun chhinchhiahtlak a ni. Transatlantic relationship tana hun chhinchhiahtlak a ni bawk” tiin Blinken chuan a sawi a. “Kan Nato alliance chu a chak zual tawh a, a hma zawng aiin a lian zual ta bawk,” tiin a sawi.
Kristersson chuan White House tlawh zui nghal bawkin President Joe Biden an State of the Union address a neihah guest of honour a ni zui bawk a ni.
White House chuan thuchhuah a siamah Nato member-a Sweden neih belh chuan ‘United States leh kan thawhpui te him zawkin a siam dawn a ni’ tiin a tarlang.
“NATO hi khawvel history a defensive alliance thiltithei ber a ni a, kan khua leh tui te him nana pawimawh a ni a, kum 75 kalta khan World War II tihchiat karah he alliance hi din a ni” tiin thuchhuah chuan a tarlang bawk.
Sweden leh Finland te chuan nikum khan NATO zawm an dil a, ram pahnih te hian hun rei tak thlawp bik nei lo military neutrality kalpui an ni a, mahse, Russia in kum 2022 tirlama Ukraine a run chuan engkim a thlak danglam taq vek a ni.
Finland-in NATO zawm a dilna chu tihfel mai a ni a, Sweden-in a dilna erawh Turkey leh Hungary tena an dodal avangin tihkhawtlaiin a awm a. Turkey chuan Sweden chu firfiak tia a puan Kurdish group te humah a puh a, Hungary erawh President Viktor Orban chu pro-Russian a nih vang a ni thung.
Hun rei tak an tihkhawtlai hnuah Turkey chuan kumin kumtir lam khan Sweden dilna chu a pawmpui a, Hungary pawhin tunkar tirlam khan remtihna a pe ve ta a ni.
Sweden-in Nato member nihna a chan theih nan hian inbiakna nasa taka kalpui niin Nato danah member ram pakhat lek pawhin member thar tur dilna chu a pawm lo a nih chuan Nato member atana pawm theih loh a nih tlat vang a ni.
Sweden-in NATO a zawm fel ta
