Nilaini Arthur Ashe Stadium-a women’s singles quarter-final match pakhatah kumin July Wimbledon final rematch kan thlir a, chawlhkar ruk liamta mai London final liana game khat lek pawh sualchhuak zo loa a ngam loh Iga Swiatek lakah tualchhung beiseina awmchhun pahnih zinga pakhat zawk Amanda Anisimova chuan rin loh tak maiin hnehna a chang tlat!
Arthur Ashe Stadium inkhelah Anisimova hian 6-4, 6-3-a Polish second seed Swiatek hnehin a career-a a tum thumna’n major semi-final a lut a, Flushing Meadows bikah chuan a last four luh vawi khatna a ni thung.
Tualchhung fans tan hlawh Anisimova hi six-times major winner laka tlawm chiang leh hle tura ngaih a nih laiin hnehna mak tak a sualchhuak zawk ta tlat a, set a hloh lo lehzel lehnghal!
American nula Anisimova hian Grand Slam title pali la tling ve tawh Naomi Osaka a tum leh ang.
Japanese world number one hlui Osaka hian quarter-final match dangah hliamin a tihbuai Czech 11th seed Karolina Muchova chu 6-4, 7-6(3)-in a hneh ve bawk.
Kum 27-a hian July 2023 khan fanu Shai hringin, nau neih chawlh thla 14 zet a lak hnuin khelmualah nu ni chungin a kir a; kumin Wimbledon-a a tlak hnu khan 23-time major champion Serena Williams pawh lo enkawl tawh thintu Frenchman Patrick Mouratoglou banin Polish coach Tomasz Wiktorowski a ruai a, trainer thar hnuaiah US Open semi-final hian a rawn chuangkai chho leh ta a ni.
Osaka coach thar Wiktorowski hi a chipui Iga Swiatek pawh kum thum chhunga Grand Slam title pali lakpui thei coach tha niin, nikum October thla khan Swiatek nen chuan an inthen a, Japanese hian a ruai chhunzawm a, a tifuh viau rih.
Vawiin women’s singles semi-final lehlamah world number one Aryna Sabalenka leh United States player zinga last four thleng pakhat zawk Jessica Pegula an intum ve thung ang.
Swiatek barakhaihtu Anisimova! Muchova laka dingchang Osaka
