Synod-in Manipur tan thawn

Mizoram Synod chuan Manipur buai avanga in leh lo chante tan thawmhnaw leh mutbu thahnem tak November 1 zan khan truck pathum hmangin a thawn.
Manipur buai avanga in leh lo chante awmna tur in sak nan Mizoram Synod hian cheng nuai 65 chu July thla khan a lo pe tawh a. Heng in hi sak zawh a ni hlawm tawh a, luah tan mek a ni. A luahtute hi an in leh lo halsak leh hak lai nen chauha tlanchhiate an ni a. Heng mite tan hian Synod Puipa thukhawm chuan Aizawl khawpui chhunga Pastor bial 5 – Mission Veng, Mission Vengthlang, Venghnuai, Kulikawn leh Tlangnuam bial hnenah thawmhnaw hak tur chi leh mutbu lam chi an theih ang ang thawhkhawm turin a ngen a. Heng bial hian an thehkhawm bakah pawl leh mimal thahnemngaiten an dahkhawm bawk.
Thuamhnaw leh mutbu lakkhawm hi November 1 zan khan Manipur panin phurh chhuah a ni a, Synod Partnership secretary Rev Z John Malsawma Colney chuan bungraw phur lirtheite hi a vailiam.
In sak thara awmte bungbel tur pawh Synod hian ngaihtuah sakin, chhungkaw 250 tan bungbel – chaw ei thleng, dekchi, plate, no, fian leh bungbel tul zualte a pe leh dawn a, heng bungbel hi tunkar hian Manipur thlenpui hman tum a ni.