Dalit Kristian leh Dalit Muslim ten India dan hnuaia an chanvo tur an sakhaw vawn vang ngawta hamthatna an chan tak loh duh loh zia lantirna’na hman thin National Protest Day chu August 10 khan India ram pumah hman a ni a. Mizoram Synod office-a thawktute pawhin zing inkhawmah Synod moderator hoa hun hmangin, Dalit Kristian leh Muslim-te tan tawngtairualna hun hman a ni.
Kum 1950 khan scheduled caste chungchangah India President-in thupek a chhuah a. ‘Dalit-te chu Hindu sakhua ni lo, Kristian emaw Muslim emaw-ah an inleh chuan scheduled caste-ah chhiar tel an ni thei loang,’ tiin. He dan avang hian Dalit Kristian leh Dalit Muslim-te chu SC-ah telh an ni ve ta lo a. Hnam hnuaihnung an nih avanga an chanvo leh hamthatna zawng zawng an hloh fai vek a ni. He dan hi mipui hriat tura puanzar a nih atangin Dalit Kristian leh Dalit Muslim-te chuan kumtin August 10 hi National Protest Day-ah an hmang thin a ni.
National Council of Dalit Christian, Catholic Bishop’s Conference of India, National Council of Churches in India leh pawl hrang hrang leh mimalte pawhin rorelnaa ngaihtuah tha turin kum 2004 atang khan vawi tam lehkha an lo thehlut tawh a, Kumin April 12 khan Supreme Court of India chuan India ram kohhran hruaitute ngenna thu leh hla ngaihtuah sakin, zirchiang tur bik ukil rual – nodal officer a ruat a; an zirchianna hi peihfelin thehlut tawh mah se, Supreme Court Bench chuan a la ngaihtuah rih lo a ni.
Synod-in Protest Day hmang
