Synod Inkhawmpui nei tan

Synod Inkhawmpui nei tan
Synod Inkhawmpui vawi 101-na chu Mission Vengthlang Presbyterian Kohhran biak inah Thawhlehni atang khan neih tan a ni a. December 8 (Pathianni) thleng a awh ang.
Synod Inkhawmpui hi kum 2010 atang khan Pastor bial-in an thleng tan a, kumin hian Mission Vengthlang bialin Mission Vengthlang Kohhranah a thleng a ni.
Moderator Rev RC Lalnghakliana kaihhruiin chawhma dar 9.30 atangin Nomination Committee an thu a, tlai dar 4.00 thleng a awh. Zan dar 6.30-ah vantlang Pathian biak Inkhawm neih a ni a, inlawmna leh kohhran chanchin report ngaihthlak a ni.
Vawiin, December 4 chawhma dar 9.30 atangin Synod Rorel tan a ni anga, tun tumah hian general agenda 35 awmin, SEC/Boards atanga thu lut engemawzat a awm bawk. Rorel hian December 7 (Inrinni) thleng a awh dawn ang.
Kumin Synod Inkhawmpui thlarau lam thupui chu “Lalpa kawng buatsaih” (Isaia 40:3-5) a ni a. Inrinni zanah Rev C Saikapa’n thupui hi a sawi ang.
December 8 (Pathianni) chawhmaah pastor nemngheh leh pro. pastor ruat inkhawm a ni anga, chawhnu inkhawmah Lalpa Zanriah Sakramen inkhawm a ni ang. Zan inkhawmah moderator kalchhuak turin thuchah a sawi dawn a ni.