Synod Inkhawmpui neih mekah dan loa sumdawng tihrem dan kawng zawn rawtna a lut a, Synod Executive Committee bawhzui tura dah a ni.
Nilaini khan Synod Inkhawmpui rorel hi tan a ni a. Palai lawmna, inchhiarna, Synod pawn palai lawmna leh inkhawmpui chibai buk zawh hnu ah moderator tang lai Rev Dr C Chawnghmingliana chuan Rev R Vanlalnghaka hnenah moderator nihna a hlan a. Moderator tharin Pathian thu, Sam 19:7-9 a chhiar a, rorel tan a ni.
Kum 2024, 2025 leh 2026 inkhawmpui thlengtu tur chu inkhawmpui hmasa lamah tihfel a lo ni tawh a. Kum 2027 Synod Inkhawmpui chu Ramhlun North Pastor bialin Ramhlun North Kohhran biak inah an thleng ang.
Kum 2024-a Pastoral ministry thupui atan ‘Inpumkhatna’ Johana 17:11 (b) pawm a ni a; pro. pastor 14 lak tura pawm a ni. Pastor bial thar 5 – Kolasib Tumpui bial, Buhchangphai bial, Darlak bial, Bawrai bial, Saipum bial leh Delhi bial chu hawn tura pawm a ni a. Minister, pastor leh pro. pastor-te awmna tura Pastoral-in ruahmanna a siam chu inkhawmpui hian a pawm bawk.
Tun inkhawmpuiah hian general 37 a awm a, ni khatnaa rel hman zingah ‘Dan loa sumdawng tihrem dan kawng zawn’ chungchang Aizawl Bethel leh Aizawl Hmar Presbytery atanga lut chu SEC bawhzui tura tih a ni.
‘KTP General Conference leh Kohhran Hmeichhe Inkhawmpui lian hun sawn rawtna’ chu kal dan ngai kal tha an ti a. ‘Bengngawng, tawngtheilote puala inkhawm buatsaih’ rawtna chu kan kal dan pangngai a tha tih a ni a, chutihrualin mahni kohhranah pawh hma lak theih tho a ni, tih a ni. ‘Rualbanlote enkawlna school din’ rawtna chu, kal dan ngai a tha riha ngaih a ni.
Nomination thu ngaihthlak a ni a, 2024 Synod Inkhawmpui programme leh puipa turte pawm niin, moderator-ah Rev RC Lalnghakliana, Synod office; secretary (Sr) – Rev PB Mankima, Chhinga Veng; secretary (Jr) – Upa Vanlalsawma Siakeng, Ramthar Tlang Veng; finance officers – Rev VL Luaia Hranleh & Rev PC Pachhunga; statistician – Rev H Laltlanthanga, Tlangnuam; senior executive secretary – Rev C Zorammawia, executive secretary – Rev Dr K Lallawmzuala te an ni.
Synod Inkhawmpui vawi 100-na hi Mission Veng Kohhran biak inah neih a ni a. December 5 atang khan tanin, December 10 thleng a awh ang. Kumin Synod Inkhawmpui thlarau lam thupui chu ‘Kraws pua Isua zui’ (Luka 9 : 23) a ni.
Synod Inkhawmpuiah dan loa sumdawng tihrem dan zawn sawi
![](https://theaizawlpost.org/wp-content/uploads/1-243.jpg)