SYNOD LEH INRENCHEM

Kima Mivam
Synod inkhawmpui tih zangkhai hi hman atanga sawi tawh a ni a, mahse, zangkhai lam a pan hleithei lova. Mizorama Inkhawmpui sang ber leh lian ber hi a ropui thei ang bera dawngsawngtu nih chakin leh, Kohhran ropui zia tarlanna ni pah fawmin, Synod Inkhawmpui thlengtuten an thleng thei zel hrih a. Chutih laiin, Synod inkhawmpui thleng thei Kohhran erawh an tlem viau a, a thleng thei chhunah an kual an kual mai a nih hi! Aizawl khaw pawnah an thleng ngai dawn lo a nih hmel. District Capital dang tan a thikawm thuai ang em?
Synod inkhawmpui tih zangkhai hian ken tel a neih pakhat chu, inkhawmpui changkanna leh ropuina tihhniam det anga ngaih theih thil awm hi a ni. Kum hmasa lama thil ropui leh hautak an lo tih tawh kha tih zel an duh a, a aia changkang leh ropui an ngaihtuah chhuah belh zel bawk a tih theih ang. Kohhran hruaitu ten tih tak zet leh thinrim dawn khawpin an la khap ngai lo a ni ang, a changkang tual tual. Synod inkhawmpui hi ti hautak lo ngam se chuan Inneih sawngbawl tih hautak loh hi an kalpui ngam vat ang!
Tin, Synod inkhawmpui palai atan hian Pastor dah tlem nise, Synod sum inrenchem pawh a hlawhtling thei nghal bawk ang. A chhan chu, Pastor hmun hla tak taka awm te pawh inkhawmpui tura an kal a ngai a, India ram khawpuiah leh hmun hla zawkah pastor kan indah tam tial tial a, chungho inkhawmpui kalna senso chu sang tak a ni. TA/DA an bill vek a. Kum tin Synod sum hi nuai tel fe a kal liam ziah a ni. Mizoram pawn Pastor te hi chu inkhawmpuiah pawimawhna bik nei lo an nih chuan palai tir lo ngam se, Synod sum inrenchem hi a kal chak deuh ang. A Pastor ho ber hian an ren tlat lo thin a tih theih ang em? T/A lah fair lo taka dil ngam an lo awm thul! Synod hnuaia thawk tawh lo Pastor Pension chena Synod Palai an la ni thei bik hi chu a dikhlel hle chuan a lang.
Tin, tuna palai kal danah hian Pastor zawng zawng atangin 100% an palai thei a, Kohhran Upa zawng zawng atangin 30% an palai tling em? A chhut peih ten lo chhhut ta mai ila! Pastor zawng zawng atangin 50% palai tur ruat nise, Synod sum kan save teuh dawn tihna a ni. Mahse, inrenchem hi an ngam tak tak lo hian a lang!?
Kum tin palai ta na na na chuan inkhawmpuiah thil an sawi huai ngam a, an thusawi pawh a tlang hma nge nge thin. Presbytery-ah Upa zawng zawng an palai vek a, thu kal lam haw lam an man bik ang chiah hian, Synod inkhawmpuiah Pastor palai ziah chuan thu leh hla an nei fumfe deuh thin reng a ni, an thu pawh a tlang deuh nge nge ang. Chu chuan thil tam takah nghawng a nei a. Pastor rual chu an intan tham thei a, an lawmman leh hamthatna dang chungchangah thurel tur lo lut pawh nise, a tlang awlsam bik thei tlat a ni. Aizawl lama Kohhran Upa pakhat phei chuan, ‘pastor chuan hlawh la lo pawh nise, an hamthatna dawn ringawt pawh hi damchhuah pui tham a ni,’ a ti thlawt a. A sawi dan chuan, ‘Khawpui pastor pension tur emaw post insawn tur emaw chu Bial huapa thlah an ni a, Bial pangngai deuh chuan a thlah nan cheng nuai nga (Rs. 5,00,000) chuang an hlan thei tlat a ni, bial chhung kohhran hrang hrang leh fellowship ten an sum pek tling khawmte hi a nep lo a sin,’ a ti a. A lo chhut vek ni fahmiang! Thawkrim zawk Upa ten hetiang hamthatna hi an dawng ve lo tluk a ni, chu bakah Synod damdawi inah sum an sen vek laiin, Pastor tana Medical lama hamthatna chu pui tham tak a ni bawk.
Presbyterian Kohhranin thawktu ngheta a lak awmchhun chu Pastorte hi an ni ta mai a. Group anga awm ve thei tur hna ngheta lak an awm ta lo. Anmahni tluk pha ber tur Missionary lah Contract vek an ni a, Pastor rual chu thianho or batch khat te kum tin an inhmuh khawm theih laiin, Missionary chu an thei ve lova, an tan inhuhona tur hun tha a awm ve hleithei lo.
Mission field-ah lah Missionary rilru pu lem lo Pastor an awm palh ta fova, missionary senior, rawngbawl dan hre zawkte chu hnawk an tih deuhin an transfer thuai mai thin a ni mai em? Tin, Kum tin Contract ziak thar an nih avang hian Pastor thenkhat hian hna nghet lo chu duh duh hunah ban theih an nih thu sawiin an vo thin em? Missionary thahnem ngai tak tak, hun lo tak anga ngaih theihah, transfer tawk si an awm ta nawk bawk. Hei hian mission field-ah baptisma chang te chu pung kum tin mahse, kohhran nghet leh member nghet an pung chuang lova. Kolkatta mission field, Delhi mission field, etc. khu an hawnna a rei tawh nen, kohhran ngialnghet an din thei lova. Sum lah an eiral hum hum si a ni! An kalsan phal der si lo.
Ka han sawi tum tak chu Synod sum inrenchemah hian a khaipa ber tur chu Pastor rual hi an ni ngei ang. Mahse, anniho hian an ren ngam tak tak tlat lo. Synod moderator atan hian Kohhran Upa hi engtikah nge kan neih ang aw? Synod Officers’ Meeting (OM) ah hian Kohhran Upa deuh vek ni ta se, Pastor lawmman sang leh hamthatna tam bik lawr lak hi an titlem ngam ang em? Isua ke bula inzir thin tirhkohte kha Pathian thu hria leh thlarau lam rawngbawltu an ni a, dawhkan kila sum rawngbawl ai chuan tawngtai leh thua rawngbawl an thlang a. An aiawha dawhkan kila rawngbawl tur Upa pasarih an thlan chhuah tak kha!
Mizoramah ve zawng, Isua thu leh hla zira, hre zawktu Pastor rualte hian thlarau lam rawng bawl aiin sum rawngbawlin dawhkan an kil tlat a, thlarau min chawmtu turin an hman lova, theology kawi khat pawh hre lo, Revival speaker te kohhranin a ruai ta mai mai thin kha a ni a. Kohhran a ro ta ngawih ngawih a nih ber tawh hi! Tin, pawlchhuak kan tam phah!
BONUS: Kohhran a chak lohvin, Kohhran upate kan dem leh ngawt thin! Nilenga pastor an awm mai mai laiin, Upa te chuan mahni hna hah takin an thawk a, zanah mahni chhungte/fate kalsanin committee, inkhawm, etc tih a lo ngai a. Pastor rawngbawlna zawng zawng deuhthawah hian Upate an inrawlh ve zel zawk a ni, a hah zawk pawh an ni fo. Mahse, lawmman leh hamthatna hi synod atangin an dawng ve ngai lo. Synod hospital-ah tak ngial pawh fee hi an chawi vek a ni. Chutah mipui tam zawkin Upa te kan beisei sang em em a, Kohhran harhna tlakchhiatah kan mawh puh fo. Mahse, a kungpui chu Pastor te hi an nih zawk hmel.