Syria hruaituten sakhua leh hnam hrang hrangte dikna chanvo an zahsak a tul : UN
Syria rama hruaitu tharte chuan an ram chhunga awm hnam leh sakhaw hrang hrangte dikna chanvo an zahsak a tul hle a, an tihhlawhtlin ngei pawh a ngai niin UN special envoy Geir Pederson chuan a sawi.
Pederson chuan Damascus-a BBC in an kawmnaah he thu hi sawichhuakin, Syria mite chuan beiseina sang tak leh hlauh rukna lian tak nei chungin an sorkar thar ding mek chu an thlir niin a sawi bawk.
UN hotu chuan Syria ram chhung leh pawna party zawng zawngte chu an ram chhunga muanna a awm ngei theih nana theihtawp chhuah turin a chah bawk.
Bashar al-Assad-a kaihhruai chu kar hnih pawh la tling lovah khan paihthlak niin, tunah hian Syria ram chhungah Hayat Tahrir al-Sham kaihhruai hel pawl, HTS tia hriatte chuan sorkar-na an siam mek a, anni hi Sunni Islamist pawl niin, kum 2016-a al-Qaeda atanga inla hrang an ni.
Anmahni lam chuan hel pawl anga sawi an duh loh thu khawvel media liante hmaah an sawi tawh a, hetih lai hian UN, US, UK leh EU te chuan firfiak pawl angin a la ngaiin, a la sawi reng thung.
Syria hruaituten sakhua leh hnam hrang hrangte dikna chanvo an zahsak a tul : UN
