November 26, Nilai zan khan UEFA Champions League 2025-26 khelh chhunzawm a ni a, vawi li chak zawn tawh Arsenal chuan 3-1 in Bayern Munich an hneh a, table hmahruaitu thar an ni. Arsenal rual hian champion lai Paris St-Germain pawhin hnehna an chang ve bawk a, table chung lam an luah chhunzawm zel.
Laipui a puak tha
Emirates Stadium-a inhmachhawn Arsenal leh Bayern Munich te hi season kal meka khel tha, Champions League-a vawi li chak zawn tawh ve ve an ni a. Arsenal hian German champion Bayern Munich hi an ngam vak loh thin vangin an inkhel hian ngaihven a hlawh phah leh zual. An khelhna league a hmahruaitu an ni ve ve bawk a, an inkhel hi a boruak a hniam thei lo hrim hrim. Inkhel hmuhnawm takah Arsenal in team khawng tak an nihzia chiang takin an lantir a, an mikhualte hi 3-1 ngawtin an hneh.
Balll kanga hlauhawm thin Arsenal chuan Bayern Munich-ah ball kanga an hlauhawmzia an tilang nawn leh. Corner atanga ball kal chu defender Jurriën Timber chuan minute 22-naah a tauh goal a, hmahruaina goal a thun. Khingpui hautak lakah goal an thun hmasak vangin Arsenal an phur viau a, inrintawkna sang zawk nen an inlan zui theih phah bawk. Gunners hian ngam takin an mikhualte an nawr chhunzawm a, goal pawh an thun belh teuh thei hle. Tottenham laka hattrick siam Eze a khel tha leh viau a, England midfielder hian goal thun theihna hun tha a neih chu awiawm takin a hlah thung.
Ball chang tlem zawk ni bawk mah se German champion an huaisen a, an si phurh sut ngei tumin tan an khawh. Hlauhawm siam a, Arsenal an chhaihbuai zauh zauh hnuin a tawp an khar fuh ta nge nge. Gnabry siamsak tha tak chu Lennart Kar chuan hnaite atangin a pet goal a, minute 32-naah an si phurh sutna goal a thun. Bayern in goal an thun hian inkhel a tihmuhnawm leh zual a, team lian pahnihte hi goal thun tumin an innawr tawn nasa hle a, inkhel hmuhnawm tak an lantir.
Chawlhlawk hnu lamah inkhel a hmuhnawm chhunzawm a, Arsenal in khel tha leh zualin goal hnih an thun belh. Gunners tan hian Noni Madueke chuan Ricardo Calfiori siamsak tha tak chu minute 69-naah hma an hruai nawn lehna goal a thun. Arsenal in hma an hruai nawn leh vangin German champion an hlauhthawng a, goal thun tur khawpin an khingpuite an nawr tlang thei tawh lo.
Bayern Munich hian an si phurh sut ngei tumin thapui an thawh. Goal thun an tuma an nawr luatah an chesual a, goal an chhuah belh. Arsenal hian fuh zetin an khingpuite an nawr let thut. Player tlan chak Gabriel Martinelli chuan fing leh vanneihthlak ang reng takin Bayern si nghak Manuel Nuer a bum a. Fuh taka ball khalh tlangin goal ruakah an goal thumna a tilut. Martinelli goal thun hnu hian goal dang a luh belh thei tawh lova, Arsenal in team lian Bayern Munich lakah 3-1 a hnehna changin point thum hlu tak an hmu zui ta a ni.
Bayern Munich lakah Arsenal an chak a, inkhel dangah Inter Milan an lo tlawm ve bawk si vangin Champions League; League round khelh mekah Arsenal chiah hi chak vek awmchhun an ni tawh. Vawi nga chak zawn tawh Gunners hian khelh nga atanga point 15 hmuin table chung ber an luah. EPL leh champions league-ah table chung ber luah kawp thei Arsenal hian an that zia an lantir chiang leh zual. Khelh 5 atang hian an khingpuite lakah goal 14 lai an thun tawh a, goal khat chiah an la chhuah. Arsenal lakah tlawm mah se Bayern hian point 12 hmuin table chung lamah an awm chhunzawm a, pathumnaah an awm mek.
PSG an chak leh ta
Tlawm zeuh nei bawk mah se champion lai Paris St-Germain an insiamtha a, nilai zana an khingpui Tottenham Hotspurs an lehthal a, harsa taka hnehna changin point thum an hmu a, pahnihnaah an inhlangkai.
Parc des Princes-a lenglut Tottenham in bul an tan tha a, Richarlison chuan minute 32-naah hmahruaina goal a thun. Goal an chhuah hnuin PSG tan Vitinha chuan 45-naah goal thunin an si phurh a sut. Chawlhlawk hnu lamah pawh Tottenham in goal an thun hmasa nawn leh a, minute 50-naah Randal Kolo Muani chuan Spurs hmahruai nawn lehna goal a thun. Hmahruai nawn leh mah se Vitinha chuan minute thum hnu lekah an si phurh a sut leh. 2-2 a nih hnuin PSG in goal hnih an thun zawn a, 4-2 in hma an hruai let. Spurs in goal khat thun leh bawk mah se Vitinha chuan hattrick siam nan penalty a pet goal zui leh a, PSG hian an mualah 5-3 in hnehna an chang zui ta a ni.
Table chung berah Arsenal
