Taimaknain a hneh thin

Naupang tê an ni chungin an sahimna zawngin
an tlanchhia a, an tlanchhiatna hmunah pawh lehkha an zir tho. An zir a ni satliah lo a, taima takin an zir. HSLC pawh raltlan naupang engemaw zatin an pass.
Farkawn-a tlanchhia raltlan naupang zingah mi 12-in HSLC an pass a, an zinga panga phei chuan distinction-ah an pass a ni mai lo, letter an hmu thuai thuai mai!
Myanmar atanga Mizorama tlanchhia raltlan naupangte hi English an thiam vak lo tlangpui a; Myanmar-ah kawl tawnga lehkha an zir avangin English-ah an chak lo. Duhlian tawng hmang an awm laiin Myanmar atanga Mizorama tlanchhia engemaw zat chu Duhlian tawng hmang lo an ni a, raltlan naupang, Mizorama sikul kalte pawh hi English-a chak lo, Duhlian tawng thiam mang lo an ni fur ang. Chuti chung chuan nikum lam ang bawkin raltlan naupangte’n kuminah result tha tak an nei leh fur mai.
Raltlante awmchilh khua, Champhai district-a Farkawn-ah high school pahnih a awm a, Govt Thanchhuma High School-ah raltlan zirlai 10-in tun hnaia result chhuak, MBSE buatsaih HSCL exam-ah khan tha takin an pass.
Zirlai 10 zinga panga chu distinction-ah an pass a, letter an hmu vek bawk; Dawthleisungi’n chhiarkawp leh science-ah a hmu a, Iangtintlemi’n chhiarkawp, science leh Mizo-ah, Vanhnempari’n chhiarkawp, science leh Mizo-ah, Duhbawihsanga’n chhiarkawp leh science-ah, Rampengthui’n chhiarkawp, science leh Mizo-ah letter a hmu bawk.
Mi dang pangate zinga pakhatin first division-ah a pass a, second division-ah pahnih, third division-ah pahnih an pass.
Farkawn High School-ah zirlai pahnih an exam a, anni hi unau, Hannah Vancherthluaii leh J Vanlalzawma te niin, second division-ah ve ve an pass.
Farkawn Educational Staff Association secretary T Lalrindika chuan raltlan naupangte hian lehkha an zir taima a, thahnem an ngai tih a sawi.
“An taima a, lehkha zir tura fuih an ngai lo. |hahnem an ngai a, an zir ngat ngat mai ti ila a dik ang,” a ti a, “|hahnem an ngai bawk a, zirtir pawh an nuam, zirtirtute pawh an zah thiam,” a ti bawk.
Class room-ah an ngaithla tha a, in lamah taima takin an zir bawk tih a sawi a, “Phone te pawh an nei ve a, an khawih ve thin. Mahse lehkha zir a hun chuan an dah hmak mai a, phone hian zirnaah a tibuai lo,” a ti.
An khuaa raltlan naupangte hi chhiarkawpah an chak a, English-ah an chak lo tih a sawi a, English-a zir a ngai ta si a, English zir chawpa hetiang an thleng thei hi an taimakzia tilangtu a nih thu a sawi.