Taiwan chuan amah pawm leh thlawptu ram tlemte a hloh belh leh dawna ngaih niin Central American ram Honduras chuan China nena official-a inzawmna neih dan a zawng mek nia sawi a ni.
Hoduran President Xiomara Castro chuan foreign ram dangte nena inzawmna tha zawk neih tumin hma a la an ti a. Hetih lai hian Taiwan chuan Honduras chu China thanga awk lo turin a ngen thung.
China hian tun hma atang tawhin Taiwan leh Taiwan independence ram anga pawmtute chu kawmserh zelin Taiwan chu a ram bung anga a chhal tlat a ni a.
Honduras hian Taiwan hnawla China nena inzawmna neih a thlang a nih chuan Taiwan sorkar pawmtu chu khawvel ram 13 chauh an ni tawh dawn a ni.
Chu mai bakah China chuan Honduras leh a chhehvelah thuk zawkin bu a khuar dawn tihna a ni bawk a. Nilaini khan China foreign ministry chuan Honduras leader thusawi leh hmalaknaa ram dangte nena inthianthatna leh inzawmna tha neih a duh a ti chu lawmawm an tih thu an sawi.
China chuan an hruaitu Xi Jinping-an thuneihna a sawh ngheh hnuah leh zero-Covid strategy hnawla economy siam that chhoh leh a tumna kal zelah khawvel ram dangteah nasa zawka inhnim phum tumin hma a la zui zel a.
Taiwan hian kum 2016 atang khan diplomatic lama inzawmna a neihpui thin ram pariat lai a hloh tawh a, chungte chu Tsai Ing-wen in president nihna a chelh hnua thleng vek a ni.
Honduras president Castro hian kum 2021 khan thuneihna changin a foreign minster chu China nena official-a inzawmna an neih theih nana hma la turin a ti zui a, chu chu a campaign lai pawha auhla ber pakhata a neih a ni bawk.
Honduran president hian China nena inzawmna tha zawk neih chuan Taiwan nena an inzawmna a titawp dawn tihna a ni em tih a sawi chiang lo va. Mahse kum 2022 January thla kha chuan ram pahnih te nena inzawmna tha neih a duh ve ve thu a sawi thung.
Castro sorkar hian tun hnai lawkah an rama hydro electric dam siam a nih theih nan China nena inremna siam an tum mek thu sawiin Beijing chuan kum 2021 khan hydroelectric project dang siam nan Honduras hnenah hian Rs 300 million a lo puktir tawh bawk a ni.
“Honduras hi China thanga awka thutlukna dik lo siama Taiwan leh Honduras inlaichinna hun rei tawh tak tichhe lo turin kan ngen a ni,” tiin Taiwan foreign ministry thuchhuak chuan a tarlang.
Hetih lai hia Pacific Island ram Micronesia ram president kalchhuak tur David Panuelo chuan China chu an ram enthlaah leh an ram politician te thamah a puh thung
Taiwan-in amah pawmtu ram chan belh zel
![](https://theaizawlpost.org/wp-content/uploads/tap_logo-min-large.jpg)