Tamil Nadu-ah DMK leh Congress-in bial insem fel ta

Tamil Nadu-ah DMK leh Congress-in bial insem fel ta
Congress party chuan Tamil Nadu assembly inthlanpui lo awm tur atan rorel lai, Dravida Munnetra Kazhagam (DMK) nen bial insemna thuthlung an siam ta a, chawlhkar eng emaw zat inpawhna leh vantlang hriatah pawh inchuh lian tak an neih chu a titawp ta.
Inremna ang chuan Congress hian Rajya Sabha bial khat a chuh bakah assembly inthlanah bial 28-ah a chuh dawn a, kum 2021-a bial a chuh zat aiin pathumin a tam zawk dawn a ni.
National party hian a tirah chuan bial 34 leh nakkum emaw, a hnu kum khatah emaw Rajya Sabha bial dinna neih belh an duh a. Thuneihna insem an duh bawk a, hei hi DMK president leh Chief Minister MK Stalin chuan a hnawlsak a, Tamil Nadu-ah tangrual sorkarin hna a thawk dawn lo tih a sawi zui a ni.
December thla atang bial dinna zat tura inpawhna lian tak awm tan tawhah hian inremna an siam dan hi Congress tan chuan an beisei aiin a hniam hle a ni.
Hruaitu eng emaw zatin vantlang hmaah DMK hi an sawisel tawh a, hei vang hian kum 20 chhung zet an tandunna tawhna chu a chhe dawn nia sawi pawh a hlawh hman hial a. An thawh dunna hi inthlanah chuan an che tha hle zel a, kum 2019 atang khan an state inthlanpui vawi thum a zawnin hnehna an chang tawh a, kum 2024 khan a vaia lain kum 2019 pawh khan an va leh vek teuh hle bawk.
DMK hian term hnihna a zawna chelh leh an tum a. Tamil Nadu Congress Committee chief, K Selvaperunthagai chuan bial insem fel a ni tih an puan hnuah, “Kan lungawi a, kan chan turah hian kan lawm hle a ni,” a ti.
Tang dun inkara buaina hi Congress MP Manickam Tagore leh Praveen Chakravarty ten bial tam zawk leh thuneihna insem an duh thu an sawi chhuah atangin vantlangah a lang tan.
Boruak lian zelin AICC General Secretary KC Venugopal-a’n an party hruaitute chu thunun nan thupek a chhuah hial a ni.
Rahul Gandhi-a’n Stalin-a piancham chibai a buknaah pawh a tih thin, ‘unaupa’ tih a dah loh zui avangin an inzawmna a chhe hle nia sawi a ni a. A hnuah party thuneitute chuan Gandhi-a hian Stalin-a hi boruak tihdah tumin a bia niin an sawi thung.
An indawrna hmasa berah DMK-in 25+1 formula an neih chu an tawh duh loh avangin Congress hi beidawngin an inbe zui lo reng.
A hnuah DMK-in inthen tur anga ngaih theih an sawi zui a, Congress hruaitu hlun, P Chidambaram-a’n Stalin-a biain hei hi an inpumkhat lehna chhan a ni a. An formula pawh Congress chief Mallikarjun Kharge-a’n a pawmpui zui ta a ni.
Congress mi thenkhat atangin lemchang thiam, Vijay-a party thar, Tamilaga Vettri Kazhagam (TVK) chu an ngaihven hle niin a lang hman bawk a, thuneihna insem pawh an intiam hman a. Hruaitu thenkhat chuan Vijay-a larna hian Congress chu Tamil Nadu-ah chauh ni lo, an thenawma Puducherry leh Kerala-ah pawh an dinhmun chhia siam leh theih nana puitu ni theiah an ngai a ni.
Vijay-a boruak neih theih dan tur thlirin DMK chuan an thawhpui huang zauhvin party tenau zawk, Desiya Murpokku Dravida Kazhagam (DMDK) pawh a dah thawhpui tel thar a, Congress-in a chhuahsan palh hlauh chuan inven nan a ti nia ngaih a ni a. DMK kaihhruai tangrualah hian party 21 zet an awm ta a ni.
Kum 1960 chho thlenga Tamil Nadu-a thuneitu thin, Congress hi Dravidian tamna state-ah DMK emaw, All India Anna Dravida Munnetra Kazhagam (AIADMK) emaw hnunga awm an ni ta rih a. Politic hriate chuan DMK hian kum tam tak chhung chu Congress dinna hi an titlem hret hret tih an sawi a, kum 2016-a bial 41 an din atanga 2021-a bial 25 an chang a, 18-ah hnehna an chang.