Nilai zan khan Wimbledon 2025 khelh chhunzawm a ni a, phur taka inlan tualchhung tlangval Oliver Tarvet beiseina chu champion Carlos Alcaraz-a’n a tihtawp sak. Awlsam taka Alcaraz a chak lai hian Taylor Fritz chuan harsa takin hnehna a chang ve thung a, third round a inhlangkai.
Tennis-a inelna lian la hmachhawn ngai lo, University of San Diego-a zirlai pakhat ni mek Oliver Tarvet hian qualifier paltlangin Grand Slam ngaihhlut hlawh ber Wimbledon a hmachhawn. Grand Slam a hmachhawn hmasak berah mak tak maiin hnehna a chang nghal a, second round a lut. Second-ah vawi hnih champion tawh leh campion leh tura rinkai tak Carlos Alcaraz a hmachhawn. Tu pawh hmachhawn se chak thei tura in ngai Tarvet hi Alcaraz lakah khel tha viau mah se inlehthalna lian thlentir turin a chak zo ta lo thung.
Champion lai Carlos Alcaraz hi pressure tam tak; boruak rit takin a delh chunga inlan a ni a. World No. 733-naa awm mek Tarvet lakah a chak lo a nih chuan mualphona nasa tak a ni dawn a. First round-ah a khel chhe tawh bawk nen centre court-ah zangkhai lo takin a inlan. Hetihlai hian a khingpui Tarvet erawh chu nuam ti takin, delhtu boruak rit awm lek lovin a inlan thei thung. Chak zo lo pawh ni awm reng a ni a, a chak a nih hlauh phei chuan thil ropui tak a ni dawn bawk si a, hahdam takin Alcaraz a hmachhawn. Tarvet hian Alcaraz lakah bul a tan tha a, game khatnaah break theihna hun remchangte a nei hman. A khingpui Alcaraz hi Alcaraz hi break thei em lo mah se rin aiin a chai thei a, chu chu mi hmuh chak a ni.
Tarvet hi phur viau mah se Alcaraz hneh tur meuh chuan a tha tawk lova, a huaisen tawk zo lo bawk. Beiseina sang tak nen inlan bawk mah se set khatnaah game khat bak a la thei lova, chiang takin set a hloh nghal.
Set khatnaah game khat chauh la bawk mah se hun pawimawhah a chesual a, set hnihna leh set thumnaah a serve a hum zo lo v e ve a, Alcaraz lakah hian 1-6, 4-6, 4-6 in a tlawm a, Grand Slam a khelh hmasak ber Wimbledon 2025 zin kawng chu a zawh tawp ta a ni. Tarvet hian University kal chhunzawm a tum a, a zirlai hi kum 2026-ah a zo ang a. Tennis khawvel a luhchilh thuk leh zual tura ngaih a ni.
Nilai zana inkhel dangah Taylor Fritz chuan Gabriel Diallo a hmachhawn a, inkhel hmuhnawm takah harsa tkin hnehna a chang. Fritz hian Diallo lakah bul a tan tha lova, set hloh hmasa zawkah a tang. Set hloh hmasa bawk mah se set hnih a la zawn a. Set lina hloh zui leh bawk mah se a khingpui lakah hian 3-6 6-3 7-6 (7-0) 4-6 6-3 in hnehna a chang a, third round a inhlangkai. Fritz rual hian Andrey Rublev leh Karen Khachanov ten hnehna changin, third round an lut ve bawk.
