Tawihtheih lo bawlhhlawh leikhawm
Durtlang North Local Council hnuaia Local Health Sanitation Committee chuan vengchhung faina leh thianghlim zawkna atan plastic um ruak leh tawih thei lo plastic/ sarang lam atanga siam chi khawlaia paih ho chu Inrinni khan an leikhawm.
Aizawl Municipal Ward No.1 bialtu, Aizawl mayor Lalrinenga Sailo chuan he hun hi a hmanpui a. Durtlang North Local Council-in plastic atanga thil siam, paih tawh leikhawm nachang an hria chu fakawm a tih thu a sawi a, hei hi a tawpna tur a ni loa, a ward chhunga local council zawng zawng – Durtlang North bakah Durtlang, Durtlang Leitan, Leitan Ramthar, Zuangtui, Muanna Veng leh Selesih ah kalpui vek a ni dawn tih sawiin, local council hmalakna hi AMC chuan theihtawpa a puih zel tur thu a sawi a ni.
Durtlang North Local Council hnuaia Local Health Sanitation Sub Committee member-ten tlawmngaia plastic um ruak leina tur an thawhkhawm hmangin he campaign hi bul tan a ni a. Local Council sum nen tangdunin plastic um hi tum thum lei a lo ni tawh a, Rs. 10000 chuang hret man leikhawm a ni.
Tun hi an tum li leina a ni a, truck trip 4 chuang leikhawm a ni tawh. Khawtlang mipui, a bikin naupangin he hmalakna hi an hlut hle a; plastic um litre 1 chunglam Rs. 2 zelin, litre 1 or half Rs.1, litre half hnuai Rs. 0.50 (duli) in lei a ni a; sarang, appy/frooty bur ruak ang chi ho kg. ah Rs.30-a lei a ni bawk.
Ward corporator hian local council-ten plastic an leikhawmna senso phuhrukna atan Rs. 10000 theuh a pe lawk a, a phurhna tur garbage truck a ruahman sak bawk.
Tawihtheih lo bawlhhlawh leikhawm
