Mizoram larsap chuan Mizo thalaiten theihna sang tak an neih thu sawiin, an thiamna behchhanin India ram khawi hmunah pawh eizawnna tha tak tak an hmu thei, chutih rualin, sap tawng lama an buai loh laiin Hindi tawng erawh an thiam tel a tha tiin a sawi a.
India rama awm kan nih miau avangin a ram tawng pui ber Hindi thiam hi a pawimawh hle a. Mizote hi rilru chak tak, thil thiam nghal zung zung thei mai kan ni a. Hnamdang, a bikin Vai kan tihte hi chuan, an zir fe phawt loh chuan an thiam mai lem lo thin. He kan nihna quality pakhat hi kan Larsap hian a hmu chiang a, tawng kan thiam phawt chuan eng hna pawh hi Mizo thalaite tan chuan a huphurhawm love, a tihna a ni ber awm e.
Hnathawh mai thiamna kan neih laiin, engatinge tawng lamah hian kan hnufual tlat, tih hi zawhna pawimawh tak a ni awm e. Chhan hrang hrang zingah, min chiahpiahtu khualzin leh hnamdang an awm ve vak loh chu thuhran ni se, rambuai boruak khan Hindi ngaihsan lohna a keng tel deuh tlat a, chu chu tun hnu thleng hian kan la harsat phah deuh em maw ni chu a tih theih awm e.
Tunah chuan state ralmuang ber nihna hnuaiah hmasawnna hrang hrang a lo piang zel a, eizawnna lamah pawh châng tih zauh a lo ngai ta a, chuta pawimawh em em chu tawng thiam a ni a. Sumdawnna leh eizawnna atana tawng hman ngai chu Sap tawng leh Hindi a lo ni a. Sumdawnna kawngah pawh hian tawng thiam leh thiam lo kar chu a hla hle tih kan hria. Chutiang bawkin hna zawn kawngah pawh, hna sang deuh zawk han luhchilh dawnin, a ziak lam thiam viau thin mah ila, duh thala saptawng/Hindi kan leklam theih loh chuan a khawk hlauh zel mai a nih hi. Kan rilru a chak, thiam thilah kan sang ti ti mah ila, midang nena kan inelnaah rilru ang pawh sawi chhuak thei lo khawpa tawng lam kan bah tlat chuan, thiam zawka inngai hi thiam lo zawka kan ngaihten min lehpel reng mai dawn tihna a ni awm e. Hnam dang kara han khawsakhonaah pawh tawng thiam leh thiam lo chu an intlangnel hleihin midangin an en dan pawh a danglam daih zel a nih hi. Mizote hian tawng kan thiam nal phawt chuan dinhmun sang takah kan invawrh thei tih hi i hre thar leh teh ang u.
Tawng thiam hi…
