Tawnhriat inhrilhtawnna atan Aizawlah Health Conclave nei

Tawnhriat inhrilhtawnna atan Aizawlah Health Conclave nei
Health & Family Welfare department hnuaia Mizoram Health Systems Strengthening Project (MHSSP) buatsaih ni hnih awh ‘Knowledge Exchange Health Conclave’ chu Thawhlehni khan chief minister Lalduhoma’n a hawng.
Sawrkarin India rama health care system tha ber pawl Mizoram Universal Health Care Scheme (MUHCS) a duang chhuak a, empanelled hospital kaltlangin cashless-in damlo enkawl an ni tih chief minister hian a sawi.
Nasa takin hriselna hmunhma an thuamtha a, damdawi in an thuamtha a. Thawktute tan khawl changkang tak tak an lei a, hriselna lamah hmasawnna thar a tam hle tih sawiin, “Heng hmalakna tam tak hi Mizoram Health Systems Strengthening Project kaltlanga thawh a ni a. World Bank leh sawrkar laipui chungah kan lawm hle,” a ti.
India ram state hrang hrang atanga mipui hriselna lama mithiamte nen knowledge exchange an neih turah he conclave zarah hian hmalakna tur tha zawk leh hriatna zau zawk neih an beisei tih a sawi a ni.
Health minister Lalrinpuii pawhin MHSSP kaltlang hian damdawi in leh Centre an thuamtha nasa a, khawl thar tam tak an lei a, an hman tangkai avangin India rama damdawi in tha certificate dawng an neih phah nual tih a sawi.
Mizoram Health Systems Strengthening Projects hi World Bank sum hmangin kum 2021 khan kalpui tan a ni a. Kum 5 chhung kalpui tur a nih angin kumin March-ah a tawp dawn a ni.
MHSSP project director Dr Lily Chhakchhuak sawi danin, project cost hi cheng vaibelchhe 280 a ni a, kumin January khan project development objectives panga zinga pali an tihlawhtling fel. Intermediate result indicators target 16 zinga 14 an hlen tawh a, target hmabak hi kumin March ralhmaa hlen vek an inbeisei.
Hmalakna langsar pakhat chu, 2025 March-a MUHCS tlangzarh a ni a. MUHCS hnuaia enrolment target hi zaa 91 an tihlawhtling. Hna an thawh that avangin National Health Authority chuan tun January khan ‘Best Performance in Achieving Card Saturation’ lawmman a hlan a ni.
Tawnhriat inhrilhtawnnaah hian Telanagana, Meghalaya, Nagaland, West Bengal, Assam, Tamil Nadu, Gujarat, Sikkim, Arunachal Pradesh aiawh bakah Gates Foundation leh North Eastern Council aiawh an tel a ni.