Congress president Lalsawta chuan Nilaini khan Mizoram Taxi Association (MTA) office-ah lengin, an hruaitute nen an inkawm. An harsatna sawi chu a ti thei dinhmuna an din chuan chinfel sak an ni dawn tih a sawi.
MTA hruaitute chuan taxi hmanga an eizawnna kawnga an ruahman leh an harsatna hrang hrang an lo thlen a. MPCC president chuan hmasawn turin hmathar lak a ngai a, a tha lo paiha a tha zawk hmanga hma lak a ngai tih a sawi. Taxi-a eizawn chu eizawnna satliah a ni mai loa, ram rawngbawlna a ni, tiin, “Mizoram rawn tlawhtu khualzin lo dawngsawngtu pawimawh, Mizoram nihphung pholangtu in ni a. Hemi kawngah hian sawrkar hi mipui phurrit chhawk zangkhaitu tur a nih angin, in harsatna leh ruahmanna hi chinfel harsa a ni lo,” a ti.
Taxi hmanga eizawngtute harsatna tawh chu chinfel harsa lo tak vek, a ti thei dinhmuna kan din a, sawrkarna an siam phawt chuan an sutkian sak dawn a, Congress Manifesto No.3 ah taka dah a ni tih Lalsawta hian a sawi.
Tunah Mizoram pumah taxi 4000 chuang awmin, Aizawl district-ah taxi 3500 chuang a awm. Aizawl bika taxi-a eizawngtute hian chawlhkar khata ni 6 awmah ni 4 an tlan (service) thei a, ni hnih an chawl/ ding a ni. Khawpui chhungah taxi stand 75 awmin, stand nei loa tlankual an awm nual bawk.
Taxi-a eizawngte harsatna chinfel tiam
