Taxi rawng thlakna pe turin sawrkar an phut
Aizawla two wheeler taxi-te rawng inang hman tir tumnaah sawrkarin thupek chhuaha hemi rawng ang chauh tlantir phal a tum chu lirtheia eizawngtute hmakhaw ngaih lohna a ni tih Congress Thalai chuan sawiin, a rawng an thlakna man pe turin sawrkar an phut tih an sawi.
Congress Thalai Hqrs. thuchhuak chuan, 2025 August 18 atanga Aizawla two wheeler taxi rawng var chauh tlan theih tih chu lirthei khalhtute leh neitute hmakhaw ngaih lohna leh an chawbel tih buaksaknaah a ngai tih a sawi a. State Transport Authority-in Aizawl khawpui atan bik two wheeler taxi permit 3646 a pe chhuak tawh a. Congress sawrkar khan two wheeler taxi permit hi a neituten eizawnna rintlak leh lirthei dang pun dan ngun taka ngaihtuah chungin permit 500 chuang pe chhuakin, mipui leh lirthei neituten chhungkaw eizawnna atan leh innghahna atan an hmang tih a sawi.
Sawrkar inthlakah MNF sawrkarin two wheeler taxi neitute dinhmun leh khawpui chhung lirthei dinhmun ngaihtuah duh loin, politics khelhna atana hmangin permit 3000 chuang an party mi leh duhsak zawngte tan a pe a. Nasa taka khawpui a tih tawt bakah 2 wheeler taxi neitute eizawnnaah harsatna siamin an intam chhuah nasa hle tih a sawi a ni.
ZPM sawrkarah pawh two wheeler taxi neitute harsatna sutkian lam aiin zual lam a pan a. Chhungkaw chawmna atana hmangtute dinhmun ngaihtuah loin cheng sing dawn sen ngaiin rawng thlak turin a ti a. Sawrkar sum tuakna atan smart card a hranpaa sum tam tak sen ngaiin sawrkar revenue tur tuakpui a ngai leh bawk tih a sawi.
‘Hetianga harsatna thlen chhan hi MNF leh ZPM sawrkarin mipui dinhmun aia politics khelhna atana an hman vang a ni a. Mi harsa zawkte rawk hi Congress Thalai chuan a dem takzet a. ZPM sawrkarin an sum tlakchham avanga two wheeler taxi neitute lirthei cheng sing dawn sen tawh hnua smart card siamna atanga sum tuak an tum hi lirthei neitute tan phur rit tak a ni a, smart card hi a thlawna a siamsak a nih loh pawhin subsidy pe turin sawrkar kan phut a ni,’ a ti.
Taxi rawng thlakna pe turin sawrkar an phut
