Krismas boruak a zo a, Krismas hlain chart-a chhuahsan leh ta a, Taylor Swift re-recorded album ‘1989 (Taylor’s Version)’ chu Billboard 200 (albums) chart No.1 niin, he chart-a kar ruk a No.1 tlinna a ni ta a, a album dang pathum top 10-ah an lang tel bawk. Tunkar Billboard chart hi kar khat, December ni 29, 2023 leh January 4, 2024 inkar atanga lak a ni.
Billboard 200 (albums) chart hi kar khat chhunga US-a album hralh tam dan atanga tehin chart ranking siam a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm a ni.
Tunkar chart top 7-ah hian chart-a No.1 lo ni tawh vek an lang a, Taylor Swift ‘1989 (Taylor’s Version)’ hi kar khat chhungin US-ah 64,000 hralh lehin, hei hi a kar ruk nan chart-ah a No.1 pui leh ta, Morgan Wallen ‘One Thing at a Time; chu 64,000 tling lo deuh hralh lehin No.5 atangin No.2-ah a insawn a, Drake ‘For All the Dogs’ chu 58,000 hralh lehin No.6 atangin No.3-ah a insawn a, Nicki Minaj ‘Pink Friday 2’ chu 57,000 hralh lehin No.3 atangin No.4-ah a tawlh a, Taylor Swift ‘Midnights’ chu 46,000 hralh lehin No.9 atangin No.5 a kai thar leh a, Taylor Swift ‘Lover’ chu 45,000 hralh lehin No.11 atangin No.6-ah a invawrh thar leh a, SZA ‘SOS’ chu 44,000 hralh lehin No.13 atangin No.7 a kai thar ve leh ta bawk.
Noah Kahan ‘Stick Season’ chu 42,000 hralh lehin No.18 atangin No.8-ah a invawrh a, chart No.1 hlui Zach Bryan self-titled album ‘Zach Bryan’ chu 41,000 hralh lehin No.20 atangin No.9-ah a invawrh thar leh a, chart No.1 hlui bawk Taylor Swift ‘Folklore’ chu 36,000 hralh lehin No.21 atangin No.10-ah a invawrh thar ve leh ta bawk.
Taylor Swift ‘1989 (Taylor’s Version)’ a No.1 leh ta
