Taylor Swift ‘1989 (Taylor’s Version) No.1-ah a debut

Taylor Swift-i’n a album hlui ‘1989’ record thar lehin ‘1989 (Taylor’s Version)’ chu a tlangzarh thar leh a, he album hi kar khat chhungin US-ah maktduai 1.653 an hralh hman a, Billboard 200 (albums) chart No.1-ah a debut a, Taylor Swift album he chart-a No.1 kai thei 13-na a ni a, Taylor Swift album kar khat chhunga US-ah hralh tam ber a la ni a, hei bakah 2015-a Adele album ’25’, kar khata US-ah maktaduai 3.482 an hralh theih hnua kar khat chhunga US-a album hralh that ber a la ni bawk.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming leh album-a hla mal hralhna atanga album tlukpui te belhkhawm thin a ni. ‘1989 (Taylor’s Version)’ maktaduai 1.653 an hralh atanga maktaduai 1.359 chu album tak tak hralhna niin, streaming atangin 2,88,000 (on-demand official stream maktaduai 375.49) leh album-a hla mal hralhna atangin 6,000 a tling thei bawk.
‘1989 (Taylor’s Version)’ hi US-a album tlangzarh tawhah chuan streaming leh hla mal hralhna atanga album tlukpui chhiar tel loh, album tak tak hralhna bikah chauh, maktaduai 1.359 a tling a, chu chu US-a album tak tak kar khata hralh tam lamah parukna a ni a, Adeles 25 (maktaduai 3.378), *NSYNC ‘No Strings Attached’ (maktaduai 2.416), *NSYNC ‘Celebrity’ (maktaduai 1.878), Eminem ‘The Marshall Mathers LP’ (maktaduai 1.76) leh Backstreet Boys ‘Black & Blue’ (maktaduai 1.591) te chiah a pha lo. Heti hian Taylor Swift album No.1 kai thei chu 13 a tling ta, a lucky number zat chiah a ni ta a, hmeichhe zaithiam zinga he chart-a No.1 kai thei album ngah ber a nihna a sawhnghet lehzual ta a ni. Hmeichhe zaithiam chauh ni loah chuan No.1 album ngah ber chu The Beatles (19) niin, Jay-Z (14), Drake leh Swift (13 ve ve) ten an dawt.
Taylor Swift hian a album hmasa ber, ama hming chawia ‘Taylor Swift’ a tih chiah hi chart No.1-ah a kaipui lo va, he album hi No.2 a kai a, chumi hnua a album tlangzarh zawng zawng chu No.1 a la kaipui vek a ni.
‘1989’ original album hi November 2014 khan Billboard 200 chart No.1-ah a debut a, a zawn ni kher lovin kar 11 chhung a No.1 thei, he album atanga a single ‘Shake It Off’, ‘Blank Space,’ leh ‘Bad Blood’ te chu Billboard Hot 100 (singles) chart-ah No.1 an kai vek bawk a ni.
Tuna a album record tharlehah hian a original album-a hlate hi a dah leh vek a, hei bakah hian a hla la tlangzarh loh panga a dah tel a, deluxe edition atanga hla pathum dah tel bawkin, ‘1989 (Taylor’s Version)’-ah hian hla 21 a awm ta a ni.
‘1989 (Taylor’s Version)’ hi kar khatah US-ah maktaduai an hralh tlin theih leh takah hian Swift hian album hrang hrang kar khata US-a maktaduai hralh tlin theih paruk a nei tling a ta a- ‘Midnights’, ‘reputation,’ ‘1989’ (original album), ‘Red’ leh ‘Speak Now’ te pawh kar khatah maktaduai a hralh tling thei vek a, zaithiam zingah hetiang ti thei awm chhun a la ni.
‘1989 Taylor’s Version)’ hi kar khat chauh an la zuar chhuak hma nain, kumina US-a album hralh tam ber a ni nghal der tawh a, a hmaa kumina US-a album hralh tam ber pawh Swift album tho, nikuma a tlangzarh ‘Midnights’ a ni a, he album hi kuminah 7,91,000 an hralh tawh a, hei bakah hian ;Speak Now (Taylor’s Version)’, July thlaa a tlangzarh pawh 7,55,000 hralh tawhin, kumina US-a album hralh tam top three chu Swift album vek a la ni.
Korean pop group SEVENTEEN album thar ‘SEVENTEENTH Heaven: 11th Mini Album’ chu 1,00,000 hralhin No.2-ah a debut a, an album he chart top 10-a lang thei palina a ni.
Chart top 10-a lang album dang zawng zawng chu chart No.1 hlui vek niin, Drake ‘For All the Dogs’ chu 95,000 hralh lehin No.2 atangin No.3-ah a tawlh a, Bad Bunny ‘Nadie Sabe Lo Que Va a Pasar Manana’ chu 73,000 hralh lehin No.4-ah bawk a la awm a, Morgan Wallen ‘One Thing at a Time’ chu 64,000 hralh lehin No.5-ah bawk a la awm a, Rod Wave ‘Nostalgia’ chu 46,000 hralh lehin No.9 atangin No.6 a kai thar leh a, Taylor Swift ‘Midnights’ chu 45,000 hralh lehin No.6 atangin No.7-ah a tawlh a, Taylor Swift ‘Lover’ chu 44,000 aia tam deuh hralh lehin No.7 atangin No.8-ah a tawlh a, Zach Bryan ‘Zach Bryan’ chu 44,000 hralh lehin No.8 atangin No.9-ah a tawlh a, SZA ‘SOS’ chu 42,000 hralh lehin No.11 atangin, No.10- a kai thar ve leh ta bawk.