Taylor Swift hi zawng a lar khawp a, a ngaihzawng hlui te chanchin ringawt pawh chanchinthar, mite ngaihven a ni ta zel mai. Swift nena an inngaihzawn hmaa khawvelin a hming pawh a hriat lar lem lo, Swift nena an inzui tak avanga hriat lar ni ta Robert F. Kennedy Jr. fapa Conor Kennedy nupui hual neih thu pawh chanchinthar a ni ta tlat.
US politics hming lian Kennedy chhungkaw thisen kai Conor Kennedy leh Taylor Swift te inzui lai kha kum 10 chuang a ni leh tawh ang, tunah chuan Conor Kennedy leh Brazilian singer Giulia Be te chu inneih tumin an inhual ta a, an inhual thu hi Taylor-i number ngainat ‘13’-ah tak puangin, August ni 13 khan Instagram-ah an inhual thu hi an puang.
Conor Kennedy leh Taylor Swift te hi 2012 khan an lo inzui ral ral tawh a, Kennedy chhungkaw inah pawh Swift hi a tei lut ve zak zak hman a, a album ‘Red’-a hla pakhat ‘Starlight’ kha Conor-a pi leh pu te Ethel Kennedy leh Robert F. Kennedy te thlalak a hmuh atanga Taylor Swift hlaphuah a ni nghe nghe.
Conor hi Swift nen an inthen nuah model Ava Dash nen an lo inzui ve leh renrawn tawh a, Taylor Swift erawh Conor nena an inthen nuah Joe Alwyn nen kum ruk vel zet an inzui a, chutah Matty Healy nen an ni ve leh zuai a, chumi hnuah tunah a ngaihzawng Travis Kelce nen hian an intawng leh ta a ni.
Taylor Swift ‘ex’ Conor Kennedy leh singer Guilia Be inhual
