Taylor Swift-i’n a album hmasa paruk master recording neitu nihna a neih let hnuah a hla stream a pung nghal hluai

Taylor Swift-i’n a album hmasa paruk master recording neitu nihna a neih let hnuah a hla stream a pung nghal hluai
Taylor Swift-i’n a album hmasa paruk, Big Machine label hnuaia a awm laia a hla record te neitu nihna a neih let leh hnuah heng album-a hla te hi Spotify-ah stream a pung nghal hluai a a title a zirin 110% atanga 430% thlenga pung a awm.
Big Machine hi music manager Scooter Braun-a’n leiin, hetah hian Swift catalog, a album hmasa paruk te pawh a tel. Swift hian Braun te hian boruak chhe tak an lo nei sa bawk nen a, a hlate Braun kuta a awm tur chu ngaingam loin, neih let leh tumin theih tawp a chhuah a. Heng a album hmasa te record thar lehin a re-recorded album pawh a tichhuak leh nual a ni.
Braun hian Swift catalog hi a rin angin a hlawkpui ta vak lo a, Swift fans lamin a re-recorded album lam an hawisa tan thup si a, Shamrock Holdings-ah Swift catalog hi a hralh leh ta a, Swift hian Shamrock atangin heng a master recording paruk te hi a lei let leh ta a ni.
Zirtawpni kalta a Swift-i’n a catalog a lei let leh thu a puan ni-ah Swift catalog pum pui chu stream 55.1%-in a pung nghal a, nikhatah vawi maktaduai 30.64 stream a kai thei a, hla thar tichhuak pawh ni si lo tan chuan nikhat thil thua hetiang zat stream kai theih hi pui tham tak a ni.
Spotify-in a tarlan danin Swift album hmasa paruk, a masters a neih let leh tak zinga streaming pung nasa ber chu ‘Speak Now’ niin, 430%-in a pung a, a dawttu chu a self-titled album ‘Taylor Swift’ tih niin, khawvel huapin stream 220% a kai thei a, streaming pun lama pathumna chu ‘Reputation’ niin, stream 160%-in a pung ve thung.
Original ‘Fearless’ pawh Spotify stream 160%-in a pung a, ‘Red’-in dawtin, 150%-in a pung a, ‘1989’ chu a punna tlem ber niin, 110%-in a pung ve thung.