Tunlai chu Taylor Swift sawi tawh chuan ‘record a siam’ tihin a zui deuh zat zel mai a nih hi. Billboard Hot 100 (singles) chart ranking-a top 14 thlengin a album thar The Tortured Poets Department a hla hlir a awm a, tum khata he chart top 14 luah vek thei hmasa ber a ni. Taylor Swift hian 2022 khan record a lo siam tawh bawk a, chumi tum chuan a album ‘Midnights’ a hla ten tum khatah Hot 100 chart top 10 a luah vek a ni.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Tun tum chart-ah hian Taylor Swift ‘Fortnight’ featuring Post Malone chu No.1 niin, Swift hla he chart-a No.1 kai thei 12-na a ni, he chart-a No.1 kai thei hla ngahah Madonna nihrualin, parukna a ni pha ta a, hmeichhe zaithiam zinga a phak loh awm chhun chu Mariah Carey (19) leh Rihanna (13) te chiah an ni. Hetihrual hian chart top 10 a lang thei hla pawh 59 a nei tling ta a, hmeichhe zaithiam zinga a ngah ber a ni a, mipa-ah pawh Drake (77) chiah a pha lo. Hei bakah hian tunkar chart-a lang thei hla 32 a nei a, hmeichhe zaithiam zinga he chart-a tum khata hla lang thei ngah ber a ni bawk.
‘Fortnight’ hian kar khat chhungin US-ah stream maktaduai 76.2 leh radio airplay-a ngaithlatu maktaduai 31.1 bakah sales 19,000 a nei a, hei hi chart No.1-ah a debut pui ta a ni. Streaming-ah pawh he hla hi kar khata stream nasat ber niin, a hmaah record siamtu Olivia Rodrigo hla ‘Drivers License’ (maktaduai 76.1) a rawn khum chiah chiah a ni.
Taylor Swift-i’n Hot 100 chart record siam leh ta
