Taylor Swift-i’n Hurricane Helene & Milton relief-ah $5M a thawh
Hurricane Helene leh Hurricane Milton-in America a nuai a, mi tam takin harsatna an tawk a, he thlipui avanga chhiat tawkte chhawmdawl hna thawh nan Taylor Swift chuan dollar maktaduai 5 a thawh a, a sum thawh hetiang lama thawktu pawl Feeding America hnenah a hlan.
Feeding America chuan thuchhuah siamin Florida, Georgia, North Carolina leh South Carolina a chhawmdawl hna thawh nan Swift hnen atangin dollar maktaduai 5 an dawn chuan chhungkaw tam tak tan ei leh in thianghlim an dawn theih phah dawn bakah an inbenbel leh theihna turin tangkai taka hman a nih tur thu an CEO Claire Babineaux-Fontenot chuan a puang a ni.
Claire cuan, “Kan tanrual chuan chhungkaw tam takin harsatna an sut turah hian awmze neiin kan thawk thei dawn a ni. Taylor, kan lawm e, eitur tlachham leh riltama awmte tanpui tura kan kianga i din tlat kan lawm e,” a ti bawk.
September ni 26 khan Hurricane Helene hian Florida a nuai a, thlipui chak tak hian ruahpui vanawn a keng tel a, mi 230 chuangin nunna an chan a, tunah Milton a rawn thawk ve leh ta a, mi tam chu hmun him lamah sawn chhuah an ni. Heng thlipui na tak hian US state hrang hrangah hnuhma rapthlak tak tak a hnutchhiah nasa hle a ni.
Taylor Swift-i’n Hurricane Helene & Milton relief-ah $5M a thawh
