Taylor Swift-i’n Kamala Harris a thlawp thu a puang

Taylor Swift-i’n Kamala Harris a thlawp thu a puang
US President inthlang tur boruak a sang sawt hle a, milar ten an thlawp zawng an puang thin a, Taylor Swift pawhin 2024 US Presidential Election neih turah Democratic Party candidate Kamala Harris a thlawp thu social media kaltlangin a puang. Swift hian Harris leh Donald Trump ten Presidential Debate an neih zawh hnu lawkah Harris a thlawp thu hi a puang ve nghal a ni.
Swift hian Harris a dah san thu sawiin, hruaitu tha tak ni a a hriat thu a sawi a, hei bakah hian LGBTQ te dikna chanvo leh hmeichhia ten fa neih chungchanga zalenna zau zawk an neih theihna turin Harris chu ral hmatawnga tang tlak ni a ngaih thu te pawh a tarlang a, a thu post-ah hian a zawhte Benjamin Button a pawm lai thlalak dah telin, a tawpah ‘Childless Cat Lady’ tiin a indah bawk.
“Nangni ang bawkin zanin debate kha ka en ve a. I lo la ti lo a nih chuan heng candidate-te hian topic hrang hranga an sukthlek hrechiang turin tun hi zirchianna hun tha a ni,” a ti a, “Voter ka nih angin he ram tana an policy leh ruahmanna neih te ka theih ang angin ka enin ka chhiar ve a ni,” a ti bawk.
Thla kalta khan AI hmanga thlalak siamchawp pakhat a darh a, chutah chuan Taylor Swift hian Donald Trump a thlawp angin tarlan a ni a, hei hi Donald Trump-a website-ah a awm a, hemi chungchang pawh hi Swift hian sawi chhuakin, “AI hmanga thu dik lo thehdar a nih theih dan hi a hlauhawm zia ka hrechiang a ni. Thudik tawk lo chhan letna awlsam ber chu thudik puan mai hi a ni,” a ti bawk.
Taylor Swift-i’n Kamala Harris a thlawp thu a puan hian boruak a nei lian nghal hle a, Democratic vice-presidential nominee Tim Walz chuan MSNBC interview-ah Swift hi fakin, huaisen a tih thu a puang a, milar hrang hrang pawhin Swift social media post hi an thlawp tih an lantir nghal sap sap a, chung zingah chuan Selena Gomez, Jennifer Aniston, Lady Gaga, Andy Cohen, Mandy Moore, Jack Antonoff, DJ Zedd te pawh an tel.
Hetihrual hian khawvela pa hausa ber Elon Musk, Donald Trump thlawptu chuan Swift hi chhanglet ve nghalin, “A tha e Taylor…i chak e…fa chu ka neih tir che ang a ka nunna thapin i zawhte ka ven sak ang che,” a ti. Donald Trump erawh Swift-i’n Harris a thlawp thu a puan chungchanga a ngaihdan an zawhna chu, “Ngaihdan engmah ka nei lo,” tiin a chhang thung.
Taylor Swift Instagram post hian minute 13 chhung lekin ‘like’ maktaduai a nei tling nghal a, tunlai khawvel mihring lar leh huhang nei lian ber a ni bawk a, Harris tan chuan thawk huai huaina tham a tlin rualin, Republican candidate Trump-a tan chuan thin phut deuh dawtna tham a ni ve thung ngei ang. Swift thlawpna hian voter kum lama naupang zawkah nghawng nei lian tura ngaih a ni.
Hetihrual hian Taylor Swift hian tum dangah pawh Democratic party hi a lo thlawp tawh thin a, 2020 inthlanpuia Joe Biden leh Trump an inkhin pawh khan Swift hian Biden a lo support tawh bawk a ni.