Taylor Swift-i’n record siam leh ta Songwriters Hall of Fame-ah lak luh a ni dawn

Taylor Swift-i’n record siam leh ta
Songwriters Hall of Fame-ah lak luh a ni dawn
Tunlai rimawi khawvelah na na na chuan Taylor Swift huhang aia lian a awm thei rih lo chu a ni deuh ber a, a thlen chin apiangah record a siam deuh zawih zawih mai a nih hi. Tunah chuan 2026 Songwriters Hall of Fame a lak luh tur zingah a tel tih an puang leh ta a, hei hi pawh record a ni. Swift hi kum 36 mi niin, hmeichhe zaithiam zinga SHOF a lak luh naupang ber a ni dawn ta.
Kumin SHOF lak luh turah hian Swift bakah Alanis Morisette, Kenny Loggins, Gene Simmons leh Paul Stanley, Christopher “Tricky” Stewart, Terry Britten leh Graham Lyle bakah Walter Afanasieff te an tel bawk.
SHOF a lak luh ni thei tur hian hlaphuahthiam ten an hla phuah zawrh suma an chintir hmasak ber atanga kum 20 tal a liam phawt a ngai a, chuvangin class of 2026 a tel tur chuan 2006 leh a hmalama hlaphuah, commercial a lo nei tawh an nih a ngai.
Taylor Swift hian June 2006 khan a hla hmasa ber ‘Tim McGraw’a tlangzarh a, kumin SHOF Induction leh Award gala hi June ni 11-ah, Marriott Marquis Hotel, New York City-ah neih a ni dawn a, chuvangin kumin hi SHOF a lak luh tura chhawp chhuah a nih theihna hmasa ber a ni hman chiah a, a lut nghal thei dawn a, hetianga hall of fame-a lak luh an nih theihna hmasa bera lut nghal hi sawi tur an tam lo hle a ni.
Kumin SHOFa lak luh tur zinga mi Walter Afanasieff hi non-performing songwriter (zaithiam ni lo ti mai ila) a ni a, Mariah Carey hla hit ‘All I Want for Christmas Is You” tih te, “My All,” “Hero,” “Love Will Survuve” leh ‘One Sweet Day” tih hlate phuahtu a ni.
Terry Britten leh Graham Lyle te pawh hi non-performing songwriter niin, “What’s Love Got To Do With It,” “We Don’t Need Another Hero (Thunderdome)”, “Typical Male”, “Devil Woman” leh “I Should Have Known Better” tih te pawh an hlaphuah zinga lar zual an ni.
Christopher “Tricky” Stewart pawh hi non-performing songwriter tho niin, Rihanna hla hit “Umbrella,’ Beyonce hla hit “Single Ladies (Put a Ring on It),” “Obsessed,” “Just Fine,” leh “Break My Soul” tih hla phuahtu a ni.
KISS member Gene Simmons leh Paul Stanley te hi chu performing songwriter niin, “Rock and Roll All Nite”, “I Love It Loud”, “Calling Dr. Love”, “Shout It Out Loud” leh “Christine Sixteen” te pawh an hla lar zingah a tel.
Kenny Loggins pawh performing songwriter niin, “Danny’s Song”, “Footloose”, “Celebrate Me Home”, “Return to Pooh Corner” leh “What a Fool Believes” tihte pawh a hla lar zingah a tel.
Alanis Morisette pawh performing songwriter niin “You Oughta Know”, “Ironic”, “Hand in My Pocket”, “Thank U” leh “Uninvited” te pawh a hla phuah lar zingah a tel.