Rin lawk ang ngeiin Taylor Swift album thar ‘The Tortured Poets Department’ chu Billboard 200 (albums) chart No.1-ah a debut a, he album hi kar khat chhunga album stream nasat ber niin, Swift album he chart-a No.1 kai thei 14-na a ni bawk a, soloist zinga he chart-a No.1 album ngah ber Jay-Z a nih rual ta chiah a, overall-ah pawh No.1 album 19 nei thei The Beatles chiah a pha lo. He chart hi kum 70 dawn an lo kalpui tawh a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna (traditional album sales) bakah streaming atanga album tlukpui leh album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ hi kar khat chhungin US-ah maktaduai 2.61 an hralh thei a, chung zinga maktaduai 1.914 chu album tak tak (digital download album, CD, vinyl LP leh cassette) hralhna niin, streaming atangin 6,83,000 (on-demand official stream maktaduai 891.37) a ni a, album-a hla mal hralhna atangin 14,000 a tling thei bawk.
Album-a hla 31 te stream belhkhawm chu on-demand official stream maktaduai 891.34 a tling thei a, chu chu album 6,83,000 tlukpui niin, hei hi album tlangzarh tawh zawng zawnga kar khat chunga stream nasat ber record a ni a, album tak tak hralh zat maktaduai 2.61 pawh hi US-a kar khat chhunga album hralh tam pathumna a ni pha bawk.
TTPD hi April ni 19 a tlangzarh kha niin, a standard digital download album-ah hla 16 awmin,, hla 17 awmna physical confuguration a awm bawk. A album a tlangzarh atanga darkar hnih hnuah Swift hian hla 31 awmna, expanded version chu digital download leh streaming album-in a tlangzarh leh bawk.
TTPD hi Taylor Swift album zinga US-a kar khat chhunga copy maktaduai hralh tlin theih pasarihna a ni a, a album dang 1989 (Taylor’s Version), Midnights, reputation, 1989, Red leh Speak Now te pawh a tlangzarh hlimah kar khat chhungin US-ah maktaduai a hralh tling vek a, zaithiam zinga kar khat chhunga maktaduai hralh tlin theih album ngah ber a la ni.
Chart No.1 hlui Future leh Metro Boomin ‘We Don’t Trust You’ chu 69,000 hralh lehin No.3 atangin No.2 a kai thar leh a, chart No.1 hlui bawk Beyonce ‘Cowboy Carter’ chu 66,000 hralh lehin No.2 atangin No.3ah a tawlh a, chart No.1 hlui bawk Morgan Wallen ‘One Thing at a Time’ chu 64,000 hralh lehin No.4-ah bawk a la awm.
Pearl Jam album tar ‘Dark Matter’ chu 59,000 hralhin No.5-ah a debut. He album hi streaming atangin 7,000 tlukpui hralhin, album-a hla mal hralhna chu belh tham a ni lo va, album tak tak hralh chu 52,000 a ni. Pearl Jam chart top 10-a lang thei album 13 an nei tling ta a ni.
Future leh Metro Boomin ‘We Still Don’t Trust You’ chu 54,000 hralh lehin No.1 atangin No.6-ah a tawlh a, Noah Kahan ‘Stick Season’ chu 45,000 hralh lehin No.5 atangin No.7-ah a tawlh a, Benson Boone ‘Fireworks & Rollerblades’ chu 40,000 hralh lehin No.7 atangin No.8-ah a tawlh a, chart No.1 hlui SZA ‘SOS’ chu 39,000 hralh lehin No.8 atangin No.9-ah a tawlh a, chart No.1 hlui bawk Taylor Swift ‘Lover’ chu 37,000 hralh lehin No.11 atangin No.10 a kai thar ve leh ta bawk.
Taylor Swift ‘TTPD’-in record siamin Billboard 200-ah a No.1
