Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, he chart-ah hian a zawn lovin kar 15 a No.1 tling ta a, Chappell Roan ‘The Rise and Fall of a Midwest Princess’ pawh No.2 a kai ve ta bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin US-ah 85,000 an hralh leh a, chung zinga 57,000 chu streaming atanga album tlukpui (on-demand official stream maktaduai 74.77) niin, album tak tak hralh chu 28,000 a ni a, album-a hla mal hralhna chu chhiar tham a ni lo.
TTPD hi Taylor Swift album tlangzarh tawhah chuan he chart-a No.1 ni rei thei ber a la ni a, kar 15 No.1 tlingin, No.1 nih reiah Carole King album ‘Tapestry’ a nih rual ta chiah a, hmeichhe zaithiam album-ah chuan e chart-a No.1 nih rei theiha pathumna a ni ta. ‘Tapestry’ hi 1971 khan kar 15 chhung a No.1 thei a ni. Hmeichhe zaithiam album zinga he chart-a No.1 ni rei ber chu Adele ‘21’ kha niin, 2011-12 khan kar 24 a No.1 thei a, a dawttu chu Witney Houston ‘The Bodyguard’ soundtrack album niin, 1992-93 khan kar 20 a No.1 thei ve thung.
He chart-a Taylor Swift album hrang hrang No.1 tawh te No.1 hun chhung belh khawm chu kar 84 a tling tawh a, soloist zinga No.1 ni rei ber record a siam a sawhnghet leh sawt a, a album 14 chu No.1 kai tawhin, Jay-Z nih rualin, soloist zinga No.1 album ngah ber a ni bawk.
Chappel Roan ‘The Rise and Fall of a Midwest Princess’ chu 72,000 hralh lehin No.3 atangin No.2 a kai a, he chart-a a thlen san ber a la ni. He album hi tun kar 10 chhung hian muang changin chart-ah a dinmun a sang hret hret a, June thla tawpa khan top 10-ah rawn langin No.12 atangin No.10-ah a invawrh a, chumi hnuah 8-6-5-5-7-8-4-3-2 te a ni kual leh tawh bawk.
Chart No.1 hlui Morgan Wallen ‘One Thing at a Time’ chu 63,000 hralh lehin No.4 atangin No.3 a kai thar ve leh ta a, Billie Eilish ‘Hit Me and and Soft’ chu 57,000 hralh lehin No.5 atangin No.4 a kai thar leh a, Zach Bryan ‘The Great American Bar Scene’ chu 48,000 hralh lehin No.7 atangin No.5 a kai thar ve leh ta bawk.
Charli XCX ‘Brat’ chu 47,000 hralh lehin No.6-ah bawk a la awm a, Noah Kahan ‘Stick Season’ chu 38,000 hralh lehin No.9 atangin No.7 a kai thar leh a, chart No.1 hlui Morgan Wallen ‘Dangerous: The Double Album’ chu 38,000 hralh lehin No.8-ah bawk a awm leh a, Twisters: The Album chu 34,000 hralh lehin No.10 atanga No.9-ah a insawn a, chart No.1 hlui Zach Bryan self-titled album chu 34,000 hralh lehin No.12 atangin No.10 a kai ve leh ta a ni.
Taylor Swift ‘TTPD’ kar 15 a No.1 tling ta
