Taylor Swift ‘TTPD’ kar 17 a No.1 tling ta

Taylor Swift ‘TTPD’ kar 17 a No.1 tling ta
Taylor Swift album ‘The Tortured Poets Department’ chu Billboard 200 (albums) chart-ah a No.1 a, he chart-a kar 17 a No.1-na a ni ta a, Billboard-in he albums chart hi 1956 atang khan kartin an tichhuak a, chart-a kar 17 chin No.1 ni thei hi album 18 chiah a la awm a ni. Hetihrual hian ROSE leh TWICE te album thar pawh top five-ah a debut ve ve a, Sabrina Carpenter ‘Fruitcake’ pawh a vawi khat nan top 10-a a lang ve ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin 2,40,000 an hralh leh a, chung zinga 2,01,000 chu album tak tak hralhna niin, streaming atangin 39,000 (on-demand official stream maktaduai 51.04) a tling a, album-a hla mal hralhna chu chhiar tham a ni lo.
TTPD hi kumin April thlaa a tlangzarh tawh kha niin, a standard album-ah chuan hla 16 a awm a, standard album a tihchhuah hnu lawka hla 15 dah belhin, hla 31 awmna album a tlangzarh leh a ‘The Tortured Poets Department: The Anthology’ a ti ve thung a, mahse, he album hi chu digital download leh streaming chauhin a tichhuak thung. Chumi hnuah CD leh vinyl edition a tichhuak leh a, kar liamta mai khan a deluxe Anthology edition CD leh vinyl tichhuak lehin, hei hian album hralh a tikal thar leh ta a ni.
Chart No.1 hlui Kendrick Lamar ‘GNX’ chu 1,25,000 hralh lehin No.2-ah bawk a la awm. He album hi kar thum a zawna a No.1 hnuah kar liamta chart-ah khan Swift TTPD hian No.2-ah a nawr tawlh ta a ni.
BLACKPINK member ROSE album thar, a solo album hmasa ber ni bawk ‘rosie’ chu 1,02,000 hralhin No.3-ah a debut a, BLACKPINK group angin top 10-a lang thei album pahnih an nei tawh a, BORN PINK phei chu 2022 khan chart No.1 a kai nghe nghe a ni.
ROSE album ‘rosie’ hi 70,000 chu album tak tak hralhna niin, streaming atangin 31,000 (on-demand official stream maktaduai 43.85) niin, hla mal hralhna atangin 1,000 a tling thei bawk. He album hi Bruno Mars nena an hla hit ‘APT.’ awmna kha a ni.
Korean hmeichhe group dang TWICE album thar STRATEGY chu 88,000 hralhin No.4-ah a debut a, kumina an group-in he chart top 10-a lang thei album pahnih an neihna a ni a, March thla khan ‘YOU-th’ chu chart No.1 an lo kaipui tawh bawk ‘STRATEGY’ hi 81,000 chu album tak tak hralhna niin, streaming atangin 6,500 (on-demand official stream maktaduai 8.86) tlingin, hla mal hralhna atangin 500 a tling thei bawk.
Chart No.1 hlui Sabrina Carpenter ‘Sort n’ Sweet’ chu 75,000 hralh lehin No.5-ah bawk a la awm a, Wicked film soundtrack pawh 74,000 hralh lehin No.3 atangin No.6-ah a tawlh a, chart No.1 hlui Michael Buble ‘Christmas’ chu 62,000 hralh lehin No.7-ah bawk a la awm a, Bing Crosby ‘Ultimate Christmas’ chu 56,000 ralh lehin No.9 atangin No.8-ah a insawn a, Billie Eilish ‘Hit Me Hard and Soft’ chu 56,000 tling lo deuh hralh lehin No.6 atangin No.9-ah a tawlh ta bawk.
Sabrina Carpenter album dang, a Krismas rimnam album ‘Friutcake’ chu 54,000 hralh lehin No.10 a ni. He album hi nikum November thlaa a tlangzarh tawh kha niin, mahse, hetihlai hi chuan digital download leh streaming services-ah chauh a tlangzarh a, tuna cuan CD, cassette leh vinyl-in a rawn tichhuak thar ve leh ta a ni.
Kumin chu chart top 10-ah tum khata album pakhat aia tam nei thei an awm ta nual a Sabrina bakah Zach Bryan, Future, Metro Boomin, Taylor Swift leh Morgan Wallen te an ni.