National Health Mission hnuaia hmalakna pakhat, National TB Elimination Programme leh Piramal Swasthya tangdun buatsaih ‘TB Free Workplace Initiative’ chu Thawhlehni khan Health minister Lalrinpuii’n a hawng.
Khawvel pum ah TB umbo beihpui thlak mek a ni a. Kum 2025-a TB natna tihrem hman tumin kawng hrang hranga hma lak a nih tawh hnu ah, ‘TB Free Workplace Initiative’ hi tun tuma hmalakna turin duan thar leh a ni. He hmalakna kaltlang hian thawktute chuan dam lo leh TB inringhlelte chauh endik tawh loin, mipui chu an hnathawhna hmuna kalchilhin, a duh apiang inendik tir tum a ni.
Health minister chuan Mizoram chu TB umbo kawnga hmalaknaah India rama ‘model state’ ni turin sawrkar laipuiin a rawn thlang tih sawiin, “State dangte entawn tur kan nih avangin kan hmalak dan tur hi uluk taka duan a ngai a, hetiang hmalakna hman tlak tak mai official-ten an duang chhuak hi lawmawm ka ti hle a ni,” a ti. TB umbo a nih theih nan thawhhopuiah mipui a sawm tih a sawi a ni.
He hmalakna hnuaiah hian ‘Portable digital x-ray machine’ leh AI assisted diagnostic software hmangin TB vei leh vei loh hi doctor-ten rang takin an endik nghal thei a. Thawhlehni pawh hian nilengin MINECO ah a duh apiang tan a thlawin endik sak an ni.
TB kai leh kai loh endiktuten mipui an kalchilh thei dawn
