Team lian City leh Liverpool an chak

Pathianni zan khan English Premier League khelh chhunzawm a ni a, champion lai Manchester City in harsa takin Wolves an lehthal a, table-ah hma an hruai chhunzawm. Pathianni zana inkhel ngaihven hlawh takah Liverpool chuan an mikhual Chelsea an hneh ve bawk.
City chakpuitu John Stones
Champion lai leh table-a pahnihnaa awm mek Manchester City hi Wolves hmachhawn turin Molineux Stadium-ah an lenglut. An len luhna mualah bul an tan tha lova, goal an chhuah hma hle. Hma takah goal chhuah mah se defender pahnih Josko Gvardiol leh John Stones te goal thun hmangin an khingpuite an lehthal thei hram thung. Wolves laka City chakpuitu chu Haaland ni lovin Stones a ni teh tlat.
Season thara che chhe tak, table mawngphaha awm mek Wolves hian hmahruaitu Manchester City lakah bul an tan tha viau a, inkhel tan atanga minute sarihna lekah Jørgen Strand Larsen chuan hmahruaina goal a thun nghal. Hma takah goal an thun vangin Wolves an phur a, an mualah point hmuh ngei tumin tan an khawh nasa hle. Point hmuh tumin tang khawng viau mah se team tha zawk City an dang tluan thei lo.
An si phurh sut tuma tan khawh City tan an tlarhma player te an che fuh hleithei lo. Haaland-a’n uiawm taka a hun tha a hlah hnu lawkah defender Josko Gvardiol chuan minute 33-naah mawi zetin a pet goal a, an si phurh a sut. Gvardiol goal thun hnu hian goal dang a luh belh thei lo va, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, an inhnehtawk zui hle. Player nei tha zawk City in hlauhawm an siam tam thei lo a, Wolves in hlauhawm an siam tam zawk teh tlat. Hun rei tak chhung goal a luh belh thei lova, hun pek belh a tawp dawn tep thlenga goal lut a awm theih loh vangin Wolves in City an chelh ngei dawn niin a lang hman. An chak zo dawn lova a lan hnuin chak ngei tuma tan khawh tluan City in an thawhrim rah an seng ta nge nge a, minute 90+5-ah defender John Stones chuan corner atanga ball kal chu fuh zetin a tauh goal a hma an hruai letna goal a thun. Stones goal thun hi VAR hmangin en nawn ngial a ni a, dik lo a lo awm lo hlauh. VAR check zawh a nih hnuin hun a tawp zui nghal a, Stones goal thun hmangin City in point thum an hmu zui ta a ni.
Wolves lakah harsa taka chak Manchester City hian season tharah vawi riat khel tawhin point 20 an hmu a, pahnihnaah an awm mek. An chung chiaha awm Liverpool nen an inkarah point khat a tla zep mek a ni.
A chung berah Liverpool
Manger thar Arne Slot hnuaia khel tha tak Liverpool chuan pathianni zan khan fiahna hautak an paltlang a, an mikhual Chelsea chu 2-1 in an hneh. Chelsea laka Liverpool hi table chung berah an awm chhunzawm zel.
Anfield a lenglut Chelsea hian bul an tan tha viau a, goal pawh an thun nghal teuh hle. Hma taka an hun tha neih chu uiawm takin an hlah hlauh thung. Chelsea in an hun tha an hlah hnuin Liverpool in penalty an hlawhchhuak a, goal thun hmasa zawkah an tang. Chelsea defender Levi Colwill chuan box chhungah Curtis Jones a titlu a, penalty a chawi. He penalty hi Mohamed Salah chuan minute 29-naah awlsam takin a pet goal a, Liverpool hmahruaina goal a thun.
Salah goal thun hmangin Liverpool hian si khat faia hmahruai chungin chawlhlawk an hmang, Chawlhlawk hmain goal thun thei lo mah se Chelsea hian chawlhlawk hnu lamah goal an thun thuai thung. Second half tan atanga minute thumna lekah Nicolas Jackson goal a thun nghal mai a, an si phurh a sut.
Goal khat ve ve an thun hnuin inkhel a hmuhnawm zui viau a, team lian pahnihte an inhnehtawk hle. Chelsea goal thun hian Liverpool muthlu a kai harh a, na takin an mikhualte an nawr zui nghal. Goal an chhuah atanga minute thum hnu lekah Reds hian fuh takin an nawr tlang a, Curtis Jones chuan hnaite atangin a pet goal a, hma an hruai nawn lehna goal a thun. Second half tir lamah goal lut thuai mah se hun tawp thlengin goal dang a luh belh thei tawh lova, Liverpool chuan an mualah hnehna hlu tak an chang ta a ni.
Manager thar Arne Slot hnuaiah Liverpool an khel tha chhunzawm a, Reds hian season thara inelna hrang hrangah vawi 11 khelin vawi 10 an chak a. Dutch coach Slot hi Liverpool manager awm tawh zawng zawng zingah bul tan tha ber, an khelh hmasak match 11 a vawi 1o chakpui thei hmasa ber a ni. Chelsea hnehtu Liverpool hian City lakah an hmahruaina hloh hman zet mah se khelh 8 atanga point 21 hmuin table chung berah an kir leh ta a ni.