Team tha ber Spain an champion

Thawhtan zing khan FIFA World Cup 2026 hmawrbawk a niin final khelh a ni. MetLife Stadium-a final khelh tha team tha ber Spain in champion lai Argentina an awpbet tluan a, phu taka hnehna changin an champion. An champion theih nana thawhhlawk tak Rodri chu ‘Best Player’ ah thlan a ni.
‘Dream Final’ ti hiala an sawi, final nghahhlelhawm takah hian Spain an khel tha viau a, inkhel tantirh phat atanga a tawp thlengin champion lai Argentina an awp bet tluan zak. Spain hian Argentina an thunun hneh em vangin beisei angin inkhel a hmuhnawm lo zawk hial a ni.
Final thlenga goal khat chiah la chhuah a, an tlarhnung phui em em Spain hian ngam takin Argentina an nawr nghal a, ngaihven hlawh Lamine Yamal a hlauhawmin goal a thun nghal teuh hle. Hma takah goal thun theihna hun tha nei bawk mah se Yamal hian uiawm takin a hun tha neih a chhawr tangkai zo lova, Argentina si nghak Emiliano Martinez a paltlang zo lo. Inkhel tantirh lamah goal thun theihna hun tha nei zawn bawk mah se Spain in an chhawr tangkai zo lo ve ve a, Argentina an him hram hram rih.
Champion lai Argentina hian insiamthat mamawh viau mah se muallaiah midfielder General Rodri leh a hote an khan loh em vangin tih theih an nei tam lo. Spain lam hian an hual tawt a, an zim buai zung zung thin a, ball an chan ve pawhin Argentina lamin an chang rei thei lo. Ball an chen ve chhunah pawh tihsual an ngah a, ball a hloh hma thei viau bawk. Golden ball dawng zui ta Rodri lakah Lionel Messi a che hleithei lova, final khelh chhung zawnin Messi hi a bo tluan a ni ber a, Argentina player langsar ber leh an himna kulhpui chu si nghak Martinez a ni.
An khingpuite an ngam loh em em laiin Argentina vanduai a kal tluang a, an defender rinrawl Lisandro Martinez chu chawlhlawk hmain lakchhuah a ngai. Martinez awm loh hnuin a kawppui Cristian Romero chu hliam vang bawkin minute 70-naah lakchhuah a ngai zui leh a, champion laiin ngai an awh lo phah leh zual. An player pawimawh pahnih an ch^n hnuin World Cup 2022-a rawlthar tha ber Enzo Fernandes chu Pau Cubarsi lakah hlauhawm taka a chet vangin minute 90+3 naah hawhchhuah a ni zui leh bawk.
Inkhel an thunun tlat bakah tam zawk an nih cheu vangin Spain hi chak ngei tura ngaih an ni a, an khingpui lakah goal an thun nual a rinawm hial. An khingpuite dang betin, kawng engkimah chungtlak vek bawk mah se goal-ah an vanduai a, minute 90 chhungin goal an thun thei bik lo.
Hun pangngaiah chak zawk an awm theih loh vangin extratime khelh chhunzawm a ni. Extratime-ah pawh Argentina an vannei zui zel a, goal chhuah lovin an him hram hram zel. Inkhel thunun a, na taka an khingpuite nawr rengtu Spain an che fuh tak nge nge. Nico Williams ball tauh let fuh leh tha tak chu bench atanga lut ve tho Ferran Torres chuan minute 106-naah pui zetin a pet goal a, hmahruaina goal a thun.
Goal an chhuah hnuin Argentina in tan khawh thar leh a, phur belh huamin an khingpuite an nawr. Si an phurh hnuin hlauhawm nawn leh bawk mah se Spain tlarhnung inrem phui tak an su thiat thei lova, Giullio Simeone chuan hun tha nei bawk mah se a chhawr tangkai zo lo. Messi pawhin hlauhawm takin shot bawk mah se Mikel Merino-a’n a lu in a lo block hman hlauh bawk a, an si phurh an sut thei lo. Spain pawhin hlauhawm takin nawr let bawk mah se goal an thun belh thei tawh bik lo. Goal thun belh thei tawh lo mah se Spain hian Ferran Torres goal thun hmangin hnehna an chang a, World Cup-ah a vawi hnih nan an champion.
Spain hian Argentina lakah 65% zet ball an chang a, shot in target ngawt pawh vawi 12 ngawt an neih laiin an khingpuite hian shot on target an nei miah lo thung. Hei hian final-a Spain chungnungzia a lantir. Spain hian team lian Portugal, France leh Argentina te phu takin an hne vek a, hei hian champion phu an nihzia a tichiang viau bawk.
World Cup 2026 chu ropui takin khar a ni ta a. World Cup-a ram 48 te an inelna hmasa berah Team tha ber leh chamapion phu ber Spain chu dan rual lohin an champion ta a ni.