Tel Aviv-ah bus pathum puak, firfiak tih a nih ring

Tel Aviv-ah bus pathum puak, firfiak tih a nih ring
Tel Aviv chhim lama Bat Yam-ah Ningani tlai khan bus pathum a puak a, Israeli police chuan mi firfiakte tih ngei niin an ngai.
Bus dang pahniha puak thei an dah erawh a puak lo hlauh niin an sawi a, ‘police thahnem tak an thleng nghal a, a titute zawn nghal an ni’ tih an sawi bawk.
Transport Minister Miri Regev chuan bus, rel leh rel tenau chi zawng zawng dintirin puak thei dang an lo la phur tel em tih endik vek a ni tih a sawi niin Israeli chanchinbute chuan an tar lang.
Social media-a thlalak darhah chuan a dinna thin hmuna bus pakhat kang hluah hluah leh a khu pawh van lama chho nguah nguah lai hmuh tur a awm.
An hriat theih chinah chuan thi leh hliam an awm lo niin police chuan an sawi bawk.
Police thupuangtu, Aryeh Doron chuan ‘thil a la kal mek’ tih sawiin officer-ten Tel Aviv-ah bomb dang a la awm em tih an enfiah zui tih a sawi.
“Kan sipaiten hmun hrang hrang an dap mek zel a ni,” tiin Doron chuan Channel 12 hnenah a sawi a, vantlang chu ‘bag leh thil dang rinhlelhawm’ an hmuh leh hriat chuan hrilh zel turin a ngen bawk.
“Mi firfiakten a hun dik lova an lo set hlauh kha kan vannei hle a; mahse, tunah rih chuan kan fihlim vek tih sawi nan a la hma,” a ti.
Tual chhung chanchinbute chuan bomb puak lo pakhat hi kg 5 vela rit niin ‘Tulkarem atanga phuba lakna’ tih a inziak tel a. Hei hi Israeli sipaiten tun hnaia West Bank-a mi firfiak an beihna sawina a ni.
Bat Yam-a thil thleng chungchangah hian Defence Minister Israel Katz chuan sipaite chu West Bank-a raltlan awmna hmunah ‘khauh lehzual’ turin a ti tih a sawi.
Israeli Prime Minister Benjamin Netanyahu pawhin thil thleng hi a ngaihven hle tih a pisain thu an chhuahah tar lan a ni.
Kan public broadcaster chuan Transport Minister Miri Regev-a chuan Morocco a tlawh mek titawpin Israel-ah a haw nghal niin an puang.