Larsap Gen. Vijay Kumar Singh (Retd) hoin Nilaini khan Lok Bhavan-ah ‘Ek Bharat Shreshtha Bharat’ kaltlangin Telangana leh West Bengal state din champha an lawm.
Larsap chuan India rama cheng hnam hrang hrang inkara inpumkhatna leh inunauna tha zawk a awm theihnan sawrkar laipui flagship programme “Ek Bharat Shreshtha Bharat (One India, Great India)” chu hlut thiam a pawimawh tih a sawi a. India ram hmun tinah tawng, hnam ziarang, nunphung, incheina, ei leh in, sakhua leh a dangah danglamna nasa tak a awm tih sawiin, “Kan danglamna hi kan chakna thuruk leh khawvel ang pawha hmuh tur vang tak a ni. Hengte hi kan hlut thiama kan vawnnun tlat a tul,” a ti.
State dang hnam ziarang leh nunphung zira hriatchian lehzual tum turin a chah a. A bikin Mizo zirlaite chu hnam dang tawng thiam tum turin a chah.
Telangana larsap Shiv Pratap Shukla thuchah bakah heng state pahnih chanchin tarlanna video thlirho a ni a. Telangana aiawhin Mizoram University assistant professor Dr Muttu Vemula leh West Bengal aiawhin Mizoram University assistant professor Dr. Arnab Roy ten thu an sawi. Mizoram University, Pachhunga University College leh Centre for Disaster Management zirlaiten hnam ziarang lan theihna an entir a. Sawm an nih angin Synod Higher Secondary School zirlaite pawh an tel.
Telangana hi India rama state naupang ber niin 2014 June 2 khan state puitlinga hlankai a ni a; West Bengal hi 1947 June 20 khan a piang a ni.
Ek Bharat Shreshtha Bharat programme hian India rama state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT tin din champha lawmna hi Lok Bhavan Mizoramah larsap kaihhruaiin June 2023 atang khan buatsaih tan a ni.
Telangana leh West Bengal state din champha an lawm
