Telegram boss hrenin awm zui zel

Telegram boss leh founder Pavel Durov chu France-ah chhuichian meka awmin a messaging app Telegram kaltlanga organised crime kalpuia puh a ni.
Kum 39-a upa Durov chu police ten kawl mekin judicial supervision hnuaiah dah niin deposit $5.6 million lai a pek a ngai bawk.
Russia-a piang billionaire hi French natinal ni tho a ni a, French police station-ah kar tin tum hnih inlan ngai leh French territory a chhuahsan khapsak a ni bawk.
Durov hi kar kalta Inrini khan Telegram app kaltlanga dan bawhchhiatna kaihhnawihah Le Bourget airport a tum ruala man a lo ni tawh a.
Paris prosecutor chuan Durov lakah formal investigation neih nghal a ni tia sawiin, amah an chhuina kawngah a messaging platform Telegram chu dan kalha organised gang tena sum inthawn nana an hman nia puhna te, thuneitute thawhpui that duhloh te, naupang kumtlinglo te sexual image thehdarh nana hman tihte a te,.
France a foraml investigation kalpui tih hian thil tisuala puh a ni nghal emaw tihna a ni lo v,a trial a tawng kher ang tihna a ni hek lo. Mahse, judge chuana chungchang chu chhuichian ngai leh tlakah a ngai tihna a ni thung.
Durov chuan mipui nawlpui hriat turin engmah sawi ala nei lo va. A lawyer David-Olivier Kaminski chuan Telegram chuan European digital regulation tin te chu social netwrok dang ang thovin an zawm vek a ti ve thung a.
A clinet chu criminal act amah pawhin a hriat reng reng loh leh a inhnamhnawihna awm hauh lova puh a ni chu ‘awm ang lo’ tiin a sawi bawk.
Tun hi social media platform neitu a platform hman dan avanga man a nih tumkhatna niin chu chuan online lamah freedom of speech leh accountability lamah inhnialna a siam nasa hle bawk a.
Tun hma deuh pawhin tech boss te chu lawmaker te hmaah an practice leh filing chungchangah te chuan an inlan tawh thin a, mahse, law enforcement tena airport-a an man an la awm ngai lo.
Hetih lai hian X neitu Elon Musk chuan Durov chu tanin moderation tih chu censorship ‘propaganda word’ a ni tia sawiin Durov chu chhuah zalen a phut thu a sawi a.
Video-sharing app sawi hlawh tak Rumble founder Chris Pavlovski pawhin Durov man a nih hnuah man ve mai a nih a hlauh avangin Europe a chhuahsan tiin a sawi.
Khawvela social network lian ber ber te chu national leh international body te nen criminal offences lian tham heng child sexual abuse image angah te thawkho an nih laiin Telegram chuan thawhhopui duh lovin a hnar vek tia puh an ni a.
Telegram hi Dubai a inbun mek niin an moderation tool te chuan industry standard an zawm vek tiin an sawi thung.
French President Emmanuel Macron chuan France chuan freedom of expression a tungnung zel dawn tia sawiin Durov man a nihna chu politics nena inzawmna nei a ni lo a ti.
Telegram-ah hian group khatah mi 2,00,000 chuang an awm thei a, chungah te chuan comment leh information te in-share tawn theih a ni a, WhatsApp angah erawh chuan group a awm thei zat tam lam chu 1,000 pel hret chauh a ni thung.
Telegram message te chu encrypted niin chumi awmzia chu a thawntu leh a dawngtu te chauhin an hmuh theih a ni a, mahse chu chu default a activate ni lovin private chats-ah manual a dah ngai a ni thung.
Paris prosecutor chuan Durov chu cyber-criminality investigation kaihhnawihah police te custody ah a awm mek a tih laiin telegram te chuan Durov chuan ‘engmah thup tur a nei lo’ an ti ve thung a.
Russia chuan finfiahna behchhan tha awm a nih loh chuan Durov man chu politics thila major technology company te rum thaih tumna tiin a sawi a.
“Durov hi Russian khua leh tui a ni a, kawng engkimah amah puih kan inhuam a ni” tiin Kremlin thupuangtu Dmitry Peskov chuan a sawi a. “Chutihrual chuan French khua leh tui a nih tel tho avangin thil tih a harsa thei thung,” a ti.
Russian lawmaker Leonid Slutsky chuan Durov puhna chu awm ang lo tia sawiin Telegram CEO chu ‘collective West te dictatorship democracy mi tang mek’ tiin a sawi.
Telegram hi major social platform lar ber te zinga tel a ni a. Kum 2013-a din chauh kha niin a bik takin Russia, Ukraine leh Soviet State hlui leh Iran-ah an hmang uar zual hle.