Temple tlawh phalsak lo

January 22-a Ram Temple hawn niah Assam-a Haiboragaon a Congress leader Rahul Gandhi-an Sri Sri Sankar Dev Satra temple tlawh a tum chu thuneitu ten remti lovin an dang.
Gandhi leh Congress leader dangte chu Haoboragaon-ah dan niin an kal zui phalsak an ni lo va. Congress chief hlui hian January 22 a Bharat Jodo Nyay Yatra a tan hma in temple tlawh a tum a ni.
Law and order crisis a awm laiin mi tute pawh Vaishnav saint Srimanta Sankardev pianna hmun an tlawh theia “Rahul Gandhi chiah a kal thei lo” tiin Assam Nagaon a Congress leader chuan a sawi a.
MP Gaurav Gogoi leh Batadrava MLA Sibamoni Bora te chuan Sri Sri Sankar Dev Satra pianna hmun hi an thleng thung a. An lo let leh hnuah Gandhi chuan Sankardev philosophy ringtu a nih thu sawiin, “Huatna thehdarh lovin mipui te thuikhawm kan duh zawk a ni,” a ti a.
“Kan tan chuan guru a nia, kal dan tur min hrilhtu a ni. Chuvangin Assam ka lokal hian amah zahna hlan tum ka ni,” tiin a sawi.
Gandhi chuan January 11 khan Sankardeva pianna hmun tlawh tura sawmna a dawn thu sawiin “Mahse, Pathianni khan law and order lamah harsatna a awm,” tia hrilh kan ni a ti bawk.
“Thil mak deuh chu law and order lamah fel lo a awm an tia, Gaurav Gogoi leh midangte an kal thei a, Rahul Gandhi chu a kal ve thei lo” tiin a sawi bawk a.
“A chhan ka hre hauh lo va, a chhan eng emaw a awm ang, mahse, hun remchang ka neih hunah Batadrava ka la tlawh tho ang. Assam leh kan ram pum hian Sankardeva kawng min kawhhmuh kan zawh a ngai a ni,” tiin a sawi.
Mahila Congress leader te chuan Gandhi-an temple a tlawh an phalsak loh avangin lungawilohna lantirna an nei a. He dharna hi Rahul Gandhi pawhin a zawm ve zui a ni.
Thuneitute chuan Gandhi chuan tlai lam dar 3 hnuah chauh temple chu a tlawh thei ang an ti a, Gandhi chuan police-te chu eng vanga temple a tlawh dang nge an nih zawhna a pe a. “PM Modi hian temple tlawh tur leh an tlawh hunah thutlukna a siam em ni?” tia sawiin, “Harsatna siam kan tum reng reng lo, temple a tawngtai tum mai kan ni,” tiin Gandhi chuan police te hnenah a sawi bawk.
Security khauh taka ruahman niin police tam tak te chuan Sri Sri Sankar Dev Satra temple panna kawngpui te chu an dang a. Local MP leh MLA te tih loh Congress leader dang te chu temple atanga 20 km vela hla Haiboragaon an pelh an rem ti lo va, media team te pawh Haiboragaon an pelh an rem ti hek lo.
Congress Sewa Dal chief Lalji Desai chuan Prime Minister leh Assam Chief Minister tena temple a tawngtai an remti lo chu ‘zahpuiawm’ tiin a sawi a. “A rapthlak a ni. Prime Minister in temple a tawngtai hun leh tawngtai tur a duh duha a kalpui hi a vanduaithlak a ni,” tiin a sawi bawk a.
“Prime Minster-in Ayodhya a pooja a tih hma chuan tute mah khawiah mah tawngtai remtih a ni lo” tiin Desai chuan a sawi bawk a. “Democracy a awm reng reng a, sorkar berin temple a tawngtai thei tur te a thlang a nia,” tiin a sawi bawk.